धरानः कांग्रेस १४ औं महाधिवेशनको नेतृत्वमा अन्ततः कमजोर देखिएका नै निर्णायक हुने भएका छन् ।
पहिलो चरणमा भएको सभापतिको प्रतिस्पर्धामा शेरबहादुर र शेखर कोइराला कसैले पनि बहुमत नल्याएकोले थोरै मत ल्याउने सभापतिका अन्य प्रतिस्पर्धी प्रकाशमान सिंह र विमलेन्द्र निधि निर्णायक देखिने भएका हुन् । देउवा पहिलो चरणमा ८२ मतले चुकेका छन् ।
कांग्रेस सभापतिको चयनका लागि फेरि मतदान हुने भएको छ । पहिलो चरणमा कसैले पनि ५० प्रतिशत कटाउन नसकेपछि फेरि मतदान हुन लागेको हो ।
सभापतिका लागि शेरबहादुर देउवा, डा.शेखर कोइराला, प्रकाशमान सिंह, विमलेन्द्र निधि र कल्याण गुरुङ प्रतिस्पर्धामा थिए । महाधिवेशनका ४ हजार ७ सय ४३ प्रतिनिधिहरूमध्ये ४ हजार ६ सय ७९ मत खसेको थियो । पहिलो चरणमै जित निकाल्नका लागि बहुमत अर्थात २३ सय ४० मत आवश्यक थियो ।
तर, सभापतिका प्रत्यासी कसैले पनि बहुमत प्राप्त गर्न सकेनन् । पहिलो चरणमा देउवाले २२५८ मत प्राप्त गर्नुभएको छ । उहाँले ८२ मतले ५० प्रतिशत कटाउन सकेनन् । कोइरालाले १७२९, सिंहले ३७१ निधिले २४९ र गुरुङले २० मत प्राप्त गरे ।
अब सबैभन्दा धेरै भोट प्राप्त गर्ने देउवा र कोइरालाका बीच प्रतिस्पर्धा हुनेछ । कांग्रेसको विधानअनुसार सभापतिमा निर्वाचित हुन बहुमत अर्थात ५० प्रतिशतभन्दा बढी मत ल्याउनैपर्छ । यदि कसैले पनि ५० प्रतिशत नकटाएको अवस्थामा सबैभन्दा धेरै मत प्राप्त गर्ने दुई प्रतिस्पर्धीकाबीच पुनः मतदान गराउनुपर्ने व्यवस्था छ ।
यस्तोमा अब तेस्रो, चौथो र पाँचौँ नम्बरका प्रकाशमान सिंह, विमलेन्द्र निधि र कल्याण गुरुङ निर्णायक देखिएका छन् ।
यी तीनजनाले यदि शेखरलाई सघाएमा विजयी हुन सक्छन् । तर यी तीनमा विमलेन्द्र या प्रकाशमानले सघाएमा देउवा विजयी हुन्छन् । यी तीनमा प्रकाशमान सिंहले ३४७ मत ल्याउँदा विमलेन्द्रको पक्षमा २७३ र कल्याण गुरुङलाई ३२ मत झरेको छ ।
यस्तो अवस्थामा तीनैको मत जोड्दा ६५२ हुन आउँछ । शेखरले ल्याएको १७२९ सँग यो मत जोड्दा २३८१ हुन आउँछ। यो भनेको ५१ प्रतिशत मत हो ।
तर देउवाले २२५८ मत ल्याएकाले दोस्रो चरणमा विमलेन्द्र या प्रकाशमानलाई तानेमा जित्न सक्छन् । देउवाको मतमा प्रकाशमानको ३४७ जोड्ने हो भने २६०५ हुन आउँछ ।
अर्कातिर २७३ मत ल्याएका विमलेन्द्रले साथ दिँदा पनि देउवाको पक्षमा २५ सय ३१ हुन आउँछ । तर यो अंकगणितीय हिसाबअनुसार महाधिवेशन प्रतिनिधि मत दिन तयार नहुन पनि सक्छन् । देउवाप्रतिको असन्तुष्टिलाई तान्दै विमलेन्द्र र प्रकाशमानलाई मनाउन सके भने उनले देउवालाई दोस्रो चरणमा हराउन सक्छन् ।