धरानः नेकपा माओवादी केन्द्रले आफ्नो अध्यक्ष चयन गरेको छ । अध्यक्षमा पुष्पकमल दाहाल प्रचण्ड फेरि माओवादी केन्द्रका अध्यक्ष बनेका छन् ।
सोमबार काठमाडौंमा बसेको केन्द्रीय कमिटी बैठकले अध्यक्षमा पुष्पकमल दाहाल प्रचण्डलाई सर्वसम्मत चयन गरेको हो । उनलाई अध्यक्षमा कृष्णबहादुर महराले समर्थन र नारायणकाजी श्रेष्ठले प्रस्ताव गरेका थिए । त्यसपछि केन्द्रीय कमिटीले उनलाई सर्वसम्मत रुपमा अध्यक्ष चयन गरेको हो ।
माओवादी केन्द्रको काठमाडौंमा सम्पन्न आठौं महाधिवेशनले आइतबार २ सय ३६ जना केन्द्रीय सदस्य चयन गरेको थियो । योसँगै अब लगातार ३ दशकभन्दा बढी माओवादी केन्द्रको अध्यक्षमा प्रचण्ड रहने भएका छन् ।

अध्यक्ष चयन भएपछि प्रचण्डले आफ्नो लागि यो अन्तिम अवसर भएको बताएका छन् । उनले नेपाली र नेपाली जनताको सेवा गर्ने यो अन्तिम अवसर भएको बताए । ‘मेरो काँधमा ठूलो जिम्मेवारी आएको महसुस गरेको छु । नेपाल र नेपाली जनताको सेवा गर्न यो मेरो लागि अन्तिम अवसर र चुनौति पनि हो,’ सम्बोधनको क्रममा उनले भने । उनले उमेर हदका कारण होस् या अन्य कुनै कारणले होस् पार्टी, जनता र देशको लागि अन्तिम पटक सेवा गर्ने अवसर पाएकोमा सबैलाई धन्यवाद दिए । उनले यो अवसरलाई सदुपयोग गरेर अगाडि बढ्ने प्रतिबद्धता व्यक्त गरे । ‘मेरो काँधमा निकै ठुलो जिम्मेवारी थपिएको महसुश गरेको छु’ उनले भने, ‘एकथरी प्रवृत्ति र शक्ति गठबन्धन टुटाउन लागिरहेका छन्। गठबन्धन निर्माण गरेर एकतालाई कायम राख्नका लागि निर्वाचनसम्म जाने वातावरण बनाउनको लागि मैले र नारायणकाजीले आज पनि धेरै मेहनत गरेका छौँ। सफल भएका पनि छौँ।’