धरानः शनिबार अघिल्लोपटकको शनिबारभन्दा धेरै श्रमदानका लागि पुगेका छन् ।
मेयर हर्कराज राई साम्पाङको आह्वानमा सयौं जनता श्रमदानका लागि पुगेका हुन् । सर्दुखोलामा इन्टेक निर्माण भइरहेको छ । शनिबार नै लगभग इन्टेक निर्माणको काम सकिएको छ । इन्टेक निर्माण, पाइप विस्तारका लागि जनताले श्रमदान गरेका हुन् । धरानसँगै विभिन्न जिल्ला (झापा, मोरङ, सुनसरी, धनकुटा र चितवनदेखि पनि) बाट जनता हेर्नकै लागि भएपनि आएका थिए ।
‘विशेषतः धरानमा पानीकै समस्या छ, पानीको दुःख मेट्न मेयर लागिपरेको देखेर स्वतस्फुर्त यहाँ आइपुगेको हुँ’, स्थानीय प्रविन राईले थपे, ‘हामीले दुःख गर्दा पानी आइहाल्छ भने किन नखट्ने ? राम्रो काम गर्ने मेयरलाई साथ दिन यहाँ आएको हुँ ।’
पकुवापछि धरान–१३ मा अघि बढिरहेको निशाने प्रोजेक्टको काम सकिएको छ भने सर्दुको पानी ल्याएर जम्मा गर्ने स्थल (करिब २ लाख लिटर अट्ने खानेपानी ट्याङ्की निर्माणस्थल) मा मेयरलगायत सयौं जनता यसपटक पनि उत्साहपूर्ण सहभागिता जनश्रमदान सकिएको छ ।
चुनाव जितेपछि उनी खानेपानीको सेवा सुधारमा तल्लिन छन् । सयौं जनताको उत्साहपूर्ण उपस्थिति देखेपछि मेयर साम्पाङ पनि चकित बनेका थिए । ‘खोलाको बगरभरी, पाखैभरी जनता देखियो, यसपटक पनि खोला र बगर श्रमदान गर्नेले नै ढाके, यसले धरानको मुहार चाँडै फेरिन्छ जस्तो अनुभूति भएको छ ।’ उनले भने ।
बिहान भावुक बन्दै भक्कानिँदै धरधरी रोएछु, अहिले खुशी छुः मेयर
खानेपानीलगायत जनताकै पक्षमा आवाज उठाइरहँदा उनी शनिबार बिहान भने भावुक बने । एक्लो हर्कराज एक्लै कुदिँरहँदा उनको साथमा कोही थिएनन् । तर पनि उनले हार मानेनन् र चुनाव जितिछाडे । चुनाव जितेपछि पनि उनी एक्लो रहेनन्, सयौं धराने जनताले साथ दिइरहे ।
धरानवासीको तिर्खा मेटाउन भन्दै खोलाखोला चहारिरहेका उनलाई जनताले भन्न थालिसकेका छन्– मेयर हुन् त हर्कजस्तो । तर पनि उनी शनिबार एकाएक भक्कानिएर धरधरी रोए । सार्वजनिकस्थलमै सञ्चारकर्मीमाझ भक्कानिएर रुन पुगे । बृक्षारोपण गरेर फर्किँदै गर्दा मेयर साम्पाङसँगै विरुवा रोप्ने भन्दै मिस धरान नामक सुन्दरी प्रतियोगिताका प्रतिस्पर्धी आएका थिए । त्यसपछि उनले केही प्रेरणादायी कुरा गर्दै थिए । बृक्षारोपणको औचित्य साथै अन्य प्रेरणादायी कुरा गर्दा गर्दै उनी भावुक बनेर रोए ।
यसक्रममा उनले आफ्नो गीत ‘देश सोच्न सकूँ म, देश बोल्न सकूँ’ का पंक्ति उच्चारण गरेका थिए । तर उनीबीचमै भक्कानिए । भक्कानिएर रुन पुगेका उनले केही सम्हालिएर गीत पूरा गर्न खोज्छन् । तर पनि उनले सकेनन् । गीतका बाँकी पंक्ति सुनाउँदै गर्दा उनी उसैगरी भक्कानिएपछि एकाएक सन्नाटा छाएको थियो ।
आफूजस्तो सानो मान्छेलाई प्रेरणा मानेर भेट्न आएको, देशविदेशदेखि सहयोग आएको हुनाले आफू भक्कानिएको बताए । उनले श्रमदानमा जनता आएको देखेर अत्यन्तै हर्षित भएको बताए । उनले भने, ‘बिहान त हर्षविभोर, भावविभोर पनि भएँ भनौं हर्षका आँशु झरेछ । तर अहिले अत्यन्तै खुशी छु, माया गर्नु भएको छ, म सानो मान्छे, मजस्तो साधारण मान्छेलाई असाधारण किसिमले चित्रण गरिदिँदा भावुक भएकै हो ।’
उनले आफूले केही गर्न नसकेपनि जनतालाई विकास के हो र विकासमा कसरी जोडिनुपर्छ भनेर सिकाइदिएको बताए । ‘अब धरान यसरी नै चल्दै जान्छ, चाहे हर्क साम्पाङ होस् या नहोस् साथै धरानमात्रै नभएर देश नै यो किसिमले विकास गर्नुपर्छ भन्ने लाग्छ ।’
तस्वीरहरुः हाम्रो कोशी आवाज