सबैलाई थाहा छ, आधुनिक फुटबलले देखेका सबैभन्दा उच्च दर्जाका दुई खेलाडी हुन्, लियोनल मेसी र क्रिस्टियानो रोनाल्डो । उनीहरूको खेल एकैसमय हेर्न पाएकाले पनि धन्य हो भनिन्छ ।
खासमा उनीहरू प्रतिद्वन्द्वी खेलाडी पनि हुन् । कुनै समय उनीहरू स्पेनमा खेल्थे । मेसीको क्लब बार्सिलोना थियो भने रोनाल्डोको रियल मड्रिड । यी दुई क्लबका लागि खेल्न खेलाडी–खेलाडीबीच मज्जाले शत्रुभावना पनि हुने नै भयो ।
यसबीच प्रश्न हो, के मेसी र रोनाल्डो साथी साथी हुन् त ? दुईबीच एक आपसमा मित्रभावना र सम्मान पनि छ त ? सायद छैन । कम्तीमा रोनाल्डोको पक्षबाट ।
पछिल्ला केही घटनाले यस्तै पुष्टि गर्छ । त्यसमध्ये पनि एक घटना त हालै मात्र भएको छ साउदी अरेबियामा । रोनाल्डो साउदी प्रो लिगमा खेलिरहेका छन् अल–नासरका लागि । अल–नासरको सबैभन्दा ठूलो प्रतिद्वन्द्वी टिममध्ये एक हो अल–सबाब । भर्खरै यी टिमबीच खेल भएको थियो ।
खेल भने अल–सबाबको पक्षमा ३–२ ले टुंगियो । त्यसमा अल–सबाबका समर्थकले रोनाल्डोलाई चिढाउन त्यही अस्त्र प्रयोग गरे, जुन अचुक हुने गर्छ । जतिबेला रोनाल्डोको खुट्टामा बल हुन्थ्यो, ती समर्थकहरूले ‘मेसी–मेसी’ भनेर नारा लगाउँथे । एकपल्ट होइन, दुईपल्ट होइन, धेरै पटक भनिएपछि रोनाल्डोको धैर्य नै टुट्यो । सबैलाई थाहा छ, रोनाल्डो पर्याप्त मात्रामा ‘एरोगेन्ट’ छन् । उनले मेसी–मेसी भनेको सुन्नै सकेनन् र त्यसको प्रतिक्रिया दिइहाले ।
रोनाल्डोले अल–सबाबको समर्थकतिर फर्केर फोहोरी संकेत गरे, जुन अश्लिल थियो । कारबाहीको रूपमा साउदी फुटबल संघले उनलाई ३० हजार साउदी रियाल जरिवाना तोकेको छ र एक खेलको प्रतिबन्ध पनि लगाएको छ ।
अझ निर्णयमा के भनिएको छ भने रोनाल्डोले यसविरुद्ध अपिल गर्न पाउने छैनन् । भनेपछि सजाय सुनाइयो, यो लागू हुनेछ । त्यसो त यति रकम रोनाल्डोका लागि केही पनि होइन । मूल प्रश्न हो, मेसीको नाम लिँदा रोनाल्डोलाई रिसचाहिँ किन उठ्छ ?
सन् २०२२ को अन्त्यतिर म्यानचेस्टर युनाइटेडबाट अल–नासर आएका ३९ वर्षीय पोर्चुगाली खेलाडीको जति धेरै प्रशंसक र समर्थक छन्, उत्तिकै उनका विरोधी र मन नपराउने पनि छन् ।
उनी कति राम्रा खेलाडी हुन्, यसमा कुनै शंका छैन । तर कहिलेकाहीं उनको व्यवहारले उनकै समर्थकलाई पनि निराश पार्ने गर्दछ । अल–सबाबको समर्थकप्रति उनले जे जस्तो व्यवहार प्रदर्शन गरे, त्यो असह्य नै छ । उनी जत्तिको खेलाडीले यस्तो गरिरहनु आवश्यक नै छैन ।
मेसी समर्थकहरू के पनि मान्छन् भने मेसीको सफलताले रोनाल्डोलाई ईष्या लाग्ने गर्छ । क्लब फुटबलमा दुवैले समान सफलता प्राप्त गरेका छन् । तर, मेसीले जसरी अर्जेन्टिनाका लागि विश्वकप जिते, त्यस्तै प्रदर्शन रोनाल्डोले पोर्चुगलका लागि गर्न सकेनन् ।
तटस्थ बस्न रूचाउनेका लागि रोनाल्डोभन्दा केही प्रिय मेसी नै हुने गर्छ । मेसीले कहिले पनि अनावश्यक हर्कत गर्ने गरेका छैनन्, जस्तो रोनाल्डो गर्छन् । अनि मेसी भर्सेस रोनाल्डोको कथा पनि कहिल्यै सकिने छैन ।