धरानः एसइई मौका परीक्षा आगामी साउन २३ देखि सञ्चालन गर्ने निर्णय गरिएको छ ।
आइतबार बसेको राष्ट्रिय परीक्षा बोर्डको बैठकले सो निर्णय गरेको हो । परीक्षा तालिका भोलिमात्र सार्वजनिक हुनेछ ।
शिक्षा, विज्ञान तथा प्रविधि मन्त्रालयका प्रवक्ता केशव दाहालले परीक्षा साउन ३१ गतेसम्म सञ्चालन हुने जानकारी दिए । गत बिहीबार २०८० सालको एसइईको नतिजा सार्वजनिक भएको थियो । लेटर ग्रेडिङ निर्देशिकाले बढीमा दुई विषयसम्म ननग्रेडेड प्राप्त गरेकाले मौका परीक्षा दिन पाउने व्यवस्था गरेको थियो । तर मन्त्रालयले आइतबार नै निर्देशिका संशोधन गरी जतिसुकै विषयमा एनजी भए पनि मौका परीक्षामा सम्मिलित हुन पाउने व्यवस्था गरेपछि त्यस्ता सबै विद्यार्थीका लागि बाटो खुला भएको छ ।
२०८० सालको एसइईमा जतिसुकै विषयमा ननग्रेडेड प्राप्त गरेको भए पनि एक पटकका लागि मौका परीक्षामा सबै विद्यार्थीलाई सम्मिलित हुन दिने शिक्षामन्त्रीस्तरीय निर्णय भएको हो । शिक्षा, विज्ञान तथा प्रविधि मन्त्रालयका प्रवक्ता दाहालले एक पटकका लागि मात्र जतिसुकै विषयमा एनजी आए पनि मौका परीक्षामा सम्मिलित हुन दिने व्यवस्था गर्न लागिएको जानकारी दिए ।
यसैगरी मन्त्री सुमना श्रेष्ठले राष्ट्रिय परीक्षा बोर्डलाई एनजी उल्लेख भएका सबै विद्यार्थीलाई मौका परीक्षाको व्यवस्था गरिदिन निर्देशन दिएकी छिन् । लेटर ग्रेडिङ निर्देशिकाअनुसार एनजी प्राप्त गरेका विद्यार्थीले तीन पटकसम्म परीक्षामा सम्मिलित हुन पाउने व्यवस्था छ । मौका परीक्षामा पनि एनजी प्राप्त गरेका विद्यार्थीले आगामी वर्ष जेजति विषयमा एनजी प्राप्त गरेको हो सोही विषयमात्र दिए पुग्छ ।