काठमाडौंः राष्ट्रिय परीक्षा बोर्डले असार २० गतेभित्र एसइईको नम्बर पठाइसक्न आग्रह गरेको छ ।
बोर्डका अध्यक्ष चन्द्रमणि पौडेलले आगामी साउन १५ गतेभित्र नतिजा प्रकाशन गर्ने लक्ष्यअनुसार विद्यालयलाई ताकेता गरिएको बताए ।
शैक्षिक सत्र २०७६ को माध्यमिक शिक्षा परीक्षा (एसइई) का विद्यार्थीको नम्बर असार २० गतेभित्र पठाउन आग्रह गरेको हो । विद्यार्थीलाई आन्तरिक तवरबाट मूल्यांकन गरी नम्बर दिन प्रधानाध्यापकको नेतृत्वमा विद्यालयमा तीन सदस्यीय समिति गठन गर्नुपर्छ । सो समितिले तयार गरेको प्रमाणित प्राप्ताङ्क तालिका (मार्क लेजर) असार २० गतेभित्र अनिवार्यरूपमा जिल्लास्थित शिक्षा विकास तथा समन्वय इकाइमा बुझाउनुपर्ने बोर्डको भनाइ छ ।
विद्यालयहरूबाट प्राप्त भएको प्राप्ताङ्क विवरण र मूल्याङ्कन समितिबाट प्रमाणित गरी पठाइएका प्राप्ताङ्क, तालिका (मार्क लेजर) भिडाइ प्रयोगात्मक र सैद्धान्तिक अंक भरे नभरेको, पूर्णाङ्क मिले नमिलेको लगायत रूजु गरेर जिल्लास्थित समन्वय इकाइलाई असार ३० गतेभित्र परीक्षा नियन्त्रण कार्यालयमा पठाउन बोर्डले आग्रह गरेको छ ।