विराटनगरः जिल्ला प्रहरी कार्यालय मोरङ र लागूऔषध नियन्त्रण ब्युरोको संयुक्त टोलीले ‘मेथान्टामाइन आइस’ नामक लागूपदार्थसहित एक व्यक्तिलाई विराटनगरबाट पक्राउ गरेको छ ।
अन्तर्राष्टिय बजारमा महङ्गो र अधिक मागका रुपमा रहेको यस मेथान्टामाइन आइससहित सुन्दरहरैंचा–८ सलकपुरका रामप्रसाद पोखरेललाई पक्राउ गरिएको १ नम्बर प्रदेश प्रहरी कार्यालयका प्रवक्ता प्रहरी उपरीक्षक दीपक पोखरेलले जानकारी दिए ।
पोखरेलको साथबाट ५३० ग्राम ९३ मिलिग्राम लागूऔषध बरामद भएको भएको छ । लागूऔषधसहित पक्राउ परेका पोखरेल उच्च घरनाका नामुद व्यवसायी भएको खुलेको छ । उनी घरजग्गा कारोबार गर्दै आएका थिए । यो प्रकृतिको लागुऔषध बरामद भएको र कारोबारी पक्राउ परेको नेपालकै तेस्रो घटना भएको बताइएको हो ।
विशेष सूचनाका आधारमा लागुऔषध कारोबारी पोखरेललाई पक्राउ गर्नका लागि लागुऔषध नियन्त्रण ब्युरो विराटनगर र जिल्ला प्रहरी कार्यालय मोरङको संयुक्त टोली परिचालन भएको थियो । परिचालित टोलीले विराटनगर महानगरपालिका–२ बरगाछीबाट लागुऔषधसहित कारोबारमा संलग्न पोखरेललाइ पक्राउ गरेको हो ।
उनी कसैलाई लागुऔषध पु¥याउन आउँदै गरेको अवस्थामा पक्राउ परेको प्रहरीले जनाएको छ । अनुसन्धानपछि प्रहरीले सुन्दरहरैंचाको सलकपुरस्थित उनको घरमा छापा मारेर थप लागुऔषध बरामद गरेको हो । मेथान्टामाइन आइस विश्वमा दुव्र्यसनीले सबैभन्दा बढी रुचाएको केमिकल ड्रग्सभित्र पर्ने प्रहरीको भनाइ छ । यसको अन्तर्राष्ट्रिय मूल्य प्रतिग्राम ८० डलरभन्दा बढी रहेको प्रहरीको भनाइ छ ।
पक्राउ परेका पोखरेलले यही लागुऔषधको कारोबार गर्नका लागि अरु मुलुकमा पनि अन्तर्राष्ट्रिय हिसाबको सञ्जाल विस्तार गरेको हुन सक्ने भन्दै प्रहरीले अनुसन्धानको दायरा फराकिलो पारेको छ । नेपालमा पनि नेटवर्क बनाएर उनले कारोबार थालेको हुन सक्ने प्रहरीको अनुमान छ ।