धरानः धरानमा फेरि सातदिनको लागि लकडाउन थपिएको छ । आज १२ बजेदेखि धरानमा जारी गरिएको लकडाउन सकिँदैछ । धरान उपमहानगरपालिकामा आज बसेको कार्यपालिकाको बैठकले सो निर्णय गरेको हो ।
भदौ १७ गतेसम्म थप ७ दिन लकडाउन थप्ने निर्णय भएको धरान उपमहानगरपालिकाका मेयर तिलक राईले जानकारी दिए । तरकारी, खाद्यान्न र दूग्धजन्य र अत्यावश्यक वस्तुका लागि बिहान १० बजेसम्म खुल्ला रहने निर्णय भएको धरान-९ का वडाध्यक्ष रत्नबहादुर कटुवालले जानकारी दिए । यसअघि तरकारी, खाद्यान्न र दूग्धजन्य र अत्यावश्यक वस्तुका लागि बिहान ८ बजेसम्म खुल्ला राख्ने निर्णय भएको थियो ।
‘लगातार संक्रमित बढिरहेका छन्’, उनले भने, ‘आज कार्यपालिकाको बैठकले फेरि सात दिन लकडाउन थप्ने निर्णय गरेको हो ।’ उता जिल्ला प्रशासन कार्यालय सुनसरीले भदौ १४ गतेसम्म निषेधाज्ञा जारी गरिसकेको छ ।
‘जिल्ला प्रशासनले पनि१४ गतेसम्म निषेधाज्ञा गरिसकेको छ, धरानमा पनि संक्रमित बढेको कारणले १७ गतेसम्मका लागि लकडाउन थप्ने निर्णय भएको हो ।’ उनले भने ।