धरानः धरान–२० भालुढुङ्गा सामुदायिक वनमा रहेको सखुवाको काँचो रुख धरान उपमहानगरपालिकाका मेयर तिलक राईले काट्न लगाएको आरोप लगाएका वनका अध्यक्ष बुद्धिमान तामाङले उजुरी दिएका छन् ।

उनले मेयर राईकै नाममा किटानीसहित उजुरी दिएका हुन् । उनले इलाका वन सव–डिभिजन कार्यालयमा उजुरी दिएको जानकारी दिए । ‘वनकै अधिकारीहरू आज मुचुल्का उठाउन आउनुभएको थियो’, उनले भने, ‘त्यही आएको बेलामा उजुरी दिइएको हो ।’ उजुरीमा उनले मेयर राईकै निर्देशन रुख काटिएको जनाएका छन् । शनिबार दिउँसो मेयर राईले करिब २ सय क्युफिटभन्दा बढी सखुवाको रुख काट्न लगाएको उनले आरोप लगाएका छन् ।

बिहीबार निवेदन दिएको र शुक्रबार उपभोक्ता, वन समितिका पदाधिकारीबीच छलफल पनि चलेको तर अध्यक्षलगायत अन्य पदाधिकारीसँग सरसल्लाह नै नगरी कोषाध्यक्ष कोषाध्यक्ष भीम बस्नेतकै संलग्नतामा रुख कटान भएको आरोप लगाउँदै आएका छन् । उता मेयर राईले भने आफुलाई केही जानकारी नभएको बताउँदै आएका छन् ।