सोलुः सोलुखुम्बु दूधकुण्ड–८ चागेस्थानस्थितमा रहेको चाँगेस्थान मन्दिरबाट मूर्ति चोरी गर्ने एकजना पक्राउ परेका छन् ।
पक्राउ पर्नेमा सोही स्थानका ३५ वर्षीय रमेश मगर रहेका छन् । सोमबार दिउँसो साढे १२ बजे मन्दिरबाट दुई वटा सिंहको मूर्ति हराएपछि मन्दिरका समितिले खोजी गर्दा फेला नपरेपछि राति पौने ११ बजे जिल्ला प्रहरी कार्यालय सोलुमा जानकारी गराएको १ नम्बर प्रदेश प्रहरी कार्यालय विराटनगरका सूचना समन्वय अधिकृत प्रहरी नायव उपरीक्षक सुमनकुमार तिम्सिनाले जानकारी दिए ।
घटनाको जानकारी पाउनसाथ खोजतलासमा खटिएको प्रहरी टोलीले मगरलाई छिमेकी जिल्ला ओखलढुंगाको सिद्धिचरण–११ स्थितमा रहेको एक होटलबाट उनले चोरी गरी लगेको मूर्तिसहित पक्राउ गरेको हो ।
पक्राउ परेका उपर कानुनी कारबाही तथा थप अनुसन्धान भइरहेको जिल्ला प्रहरी कार्यालय सोलुले जनाएको छ ।