धरानः धरानस्थित बीपी कोइराला स्वास्थ्य विज्ञान प्रतिष्ठानमा बीपीको पूर्णकदको शालिक निर्माण गरिएको छ ।
प्रतिष्ठानका प्रवक्ता डा. निदेश सापकोटाले शालिकको बुधबार अनावरण गरिएको जानकारी दिए । प्रतिष्ठानको २७ औं वार्षिकोत्सवको अवसरमा प्रतिष्ठान हातामा निर्माण भएको स्व. महामानव बीपी कोइरालाको पूर्णकदको शालिक अनावरण गरिएको उनले जानकारी दिए । उपकुलपति प्रा.डा. ज्ञानेन्द्र गिरीले सो शालिकको अनावरण गरेका थिए ।
‘बीपी प्रतिष्ठानको वार्षिकोत्सव परम्परागतरूपमा गरिएन, यसपटक शालिक अनावरण गर्दै वार्षिकोत्सव सकिएको छ । यसपटक विभिन्न व्यक्तित्वलाई नबोलाइएको र १७ जनाभन्दा बढी व्यक्तित्वलाई नबोलाइएको उनले जानकारी दिए । सेप्टेम्बर ९ तारिखका दिन वर्षेनी प्रतिष्ठानको वार्षिकोत्सव पर्ने जानकारी दिँदै उनले यसपटक विविध कार्यक्रम भने नभएको बताए । यसअघि उपकुलपतिको कार्यालयबाट बीपीको तस्वीर हटाइएको भन्दै चर्को आलोचना समेत भएको थियो ।