धरानः धरानस्थित बीपी कोइराला स्वास्थ्य विज्ञान प्रतिष्ठान धरानमा उपचारको क्रममा थप एक कोरोना संक्रमितको मृत्यु भएको छ । योसँगै प्रतिष्ठानमा मृत्यु हुने कुल संख्या ३४ पुगेको छ ।
मृत्यु हुनेमा राजविराज ३ सप्तरीका ६३ वर्षीय वृद्ध छन् । उनको राति साढे १ बजे मृत्यु भएको प्रतिष्ठानले जनाएको छ । प्रतिष्ठानका प्रवक्ता डा.निदेश सापकोटाका अनुसार मृतक विराट मेडिकल कलेज विराटनगरबाट रेफर भएर असोज ८ गते कोभिड अस्पतालमा भर्ना भएका थिए ।
उनका अनुसार मृतकमा कुनै पनि दीर्घ रोग र स्वास्थ्यमा पुरानो समस्या देखिएको छैन । वृद्धमा ज्वरो, खोकी, श्वासप्रश्वासमा समस्या देखिएपछि उनलाई धरान रेफर गरिएको हो । पीसीआर परीक्षणका लागि स्वाब संकलन गरिएका वृद्धको त्यही दिन रिपोर्ट पोजेटिभ आएपछि उपचारका लागि प्रतिष्ठानको कोभिड अस्पतालमा भर्ना गरिएको डा. सापकोटाको भनाइ छ ।
स्वास्थ्यमा समस्या थपिएपछि भेन्टिलेटरमा राखेर उपचार थालिए पनि वृद्धलाई बचाउन नसकिएको जानकारी उनले दिए । शवको व्यवस्थापन नियम अनुसार गर्ने तयारी भइरहेको सापकोटाले बताए ।
उनलाई असोज ८ गते नै प्रतिष्ठानमा कोरोना संक्रमण पुष्टि भएको थियो । उनलाई प्रतिष्ठानमा भर्ना गरेर भेन्टिलेटरमा राखेर उपचारको क्रममा नै मृत्यु भएको प्रतिष्ठानले जानकारी दिएको छ ।