धरानः धरानका अभिभावकको एक समूहले धरान उपमहानगरपालिकालाई ज्ञापनपत्र बुझाएको छ ।
धरान उपमहानगरपालिकाका मेयर तिलक राईलाई भेटेर अभिभावकले ज्ञापनपत्र बुझाएका हुन् । कतिपय विद्यालयले वैशाखदेखि पुरै शुल्क लिन थालिएको अभिभावकको भनाइ छ । अभिभावक विकास भाटीले कतिपय स्कुलले वैशाखदेखि अभिभावकसँग शुल्क लिइएको बताए । ‘अनलाइन कक्षा शुरु गरेका धरानका केही निजी विद्यालयहरुले वार्षिक शुल्कको नाममा लिँदै आएको भर्ना शुल्क तिर्न दबाब आइरहेको छ’, उनले भने ।
महामारीले व्यापार, व्यवसाय ठप्प रहेको अवस्थामा शुल्क तिर्न नसकेको अभिभावकहरूको भनाइ छ । अनलाइन कक्षामा भएका क्रियाकलापका नाममा लिइने वार्षिक शुल्क लिन नमिल्ने अभिभावकको तर्क छ । मासिक शुल्कमा पनि सकेसम्म राहत दिइनुपर्ने अभिभावकहरूले बताए । कतिपय स्कुलले भर्ना नगरे बच्चालाई अनलाइनमा सहभागी नगराउने, परीक्षामा उपस्थित नगराउने त्रास देखाइरहेको अभिभावकको गुनासो छ । उनीहरूले स्थानीय तहसँग स्वीकृति नलिइ भर्ना शुल्न लिन नपाउने जनाएका छन् ।
सरकारले भर्ना खुलेसँगै निजी विद्यालयहरूले विद्यार्थीबाट शुल्क लिन पाउने बाटो खोलिदिएको थियो । शिक्षा, विज्ञान तथा प्रविधि मन्त्रालयले भर्ना खुलेपछि सम्बन्धित स्थानीय तहसँगको सहमतिमा निजी विद्यालयहरूले शुल्क लिन सक्ने बाटो खुला गरिदिएको थियो तर धरान उपमहानगरपालिकाले केही निर्णय गर्न नसक्दा अन्यौलता कायमै छ । संविधानअनुसार नै विद्यालय तहको शिक्षा स्थानीय सरकार मातहत छ । मन्त्रालयले एक शैक्षिक सत्रका लागि भन्दै शुल्क लिने बाटो खुला गरिदिएको थियो । कोरोनाकै कारणले धरानमा विद्यालय तहमा विद्यार्थी भर्ना सुरू गरेको छैन ।
फोटोः लक्ष्मण थापा