धरानः शिक्षा, विज्ञान तथा प्रविधि मन्त्री कृष्णगोपाल श्रेष्ठले सरकारले सरकारी विद्यालय सुधार्न शिक्षा ऐन ल्याउन लागिएको बताएका छन् ।
संघीय शिक्षा ऐन ल्याउने तयारी थालेको उनले बताएका हुन् । २०२८ सालको शिक्षा ऐनले शिक्षा क्षेत्रका सबै विषय समेट्न नसकेको बताउँदै उनले जनताका छोराछोरीलाई सरकारी विद्यालयमा पढ्ने वातावरण सिर्जना हुनुपर्ने, गुणस्तरीय शिक्षा हुनुपर्ने तर्क राखे । ‘त्यसको लागि सरकारी विद्यालयको सुधार हुनुपर्छ, यो ऐन पनि त्यसैका लागि हो ।’
मन्त्री श्रेष्ठले सरकारको पहिलो प्राथमिकता गुणस्तरीय शिक्षा नै भएको प्रस्ट पारे । विकसित देशहरुमा सरकारी विद्यालय विध्यार्थी तथा अभिभावकको पहिलो प्राथमिकतामा पर्ने गरेको उल्लेख गर्दै नेपालमा पनि सरकारी विद्यालयलाई व्यवस्थित बनाउनुपर्नेमा मन्त्री श्रेष्ठको जोड थियो ।