धरानः कोभिड-१९ संकट व्यवस्थापन केन्द्र (सीसीएमसी) ले सबै तहका सबै किसिमका परीक्षाहरू स्थगित गर्न सरकारलाई सिफारिस गर्ने निर्णय गरेको छ ।
सीसीएमसीको आइतबार बसेको बैठकले सबै तहका सबै किसिमका परीक्षाहरू सोमबारदेखि नै स्थगित गर्न सिफारिस गर्ने निर्णय गरेको हो । बैठकमा सहभागी संघीय मामिला मन्त्री गणेश ठगुन्नाले रुसबै किसिमका परीक्षाहरू स्थगित गर्न सिफारिस गर्ने निर्णय गरेको जानकारी दिए ।
सोमबारदेखिका सबै परीक्षा स्थगित गर्ने सीसीएमसीले निर्णय गरे पनि जेठमा हुने एसइई परीक्षाका सम्बन्धमा भने कुनै निर्णय भएको छैन । यसअघि बसेको मन्त्रिपरिषद बैठकले विद्यालय र कलेजको पठनपाठन भौतिकरुपमा गर्न नपाइने भने पनि परीक्षाचाहिँ नरोकिने बताएको थियो । त्यसैगरी मेडिकल कलेजको पढाइ पनि नरोकिने क्याबिनेटको आदेशमा उल्लेख थियो ।
तर, आइतबार बसेको सीसीएमसीको बैठकले सोमबारदेखि हुने सबै परीक्षाहरु स्थगित गर्न सिफारिस गरेको हो ।

त्यसैगरी नेपालसँग जोडिएका अन्तर्राष्ट्रिय सीमानाका तत्काल बन्द गर्ने सरकारको तयारी छ । यसबारेमा सीसीएमसीले तयारी गरिरहेको उनले जानकारी दिए । यसअघि नै सीमा नाकामा हेल्थ डेस्क राख्ने भने पनि त्यो प्रभावकारी हुन सकेको छैन । स्रोतका अनुसार सहरी क्षेत्रमा ५०० संक्रमित र पहाडि क्षेत्रमा २०० संक्रमित पुष्टि भएमा लकडाउन गर्ने अधिकार स्थानीय प्रशासनलाई दिनसमेत सीसीएमसीले सिफारिस गरेको हो।