धरानः लिम्बुवान समूहका ५३ जना सदस्य राष्ट्रिय जनमुक्ति पार्टीमा समायोजन भएको छ ।
सोमबार धरानको होटल पूर्वीमा पत्रकार सम्मेलन गरी समायोजनपत्रमा हस्ताक्षर गरेको थियो । कार्यक्रममा लिम्बुवान समूहको नेतृत्व संघीय लिम्बूवान पार्टीका केन्द्रीय सचिव गजेन्द्र आङबुहाङ र राष्ट्रिय जनमुक्ति पार्टीका केन्द्रीय अध्यक्ष केपी पालुङ्वाले हस्ताक्षर गरेको समायोजनपत्र एक अर्कामा हस्तान्तरण गरेका थिए ।
जनमुक्ति पार्टीको जनमुक्ति विचारधारा र बहुजातीय लोकतान्त्रिक समाजवादको अवधारणामा आफूहरुको नीति पनि मिल्न गएकोले एउटा ठूलो शक्ति निर्माण गर्न आफूहरु समाजोजन गर्न मञ्जुर भएको संघीय लिम्बुवान पार्टी केन्द्रीय समितिका सचिव गजेन्द्र आङ्बुहाङले बताए ।
हाल नेपालमा बहुजातीय लोकतान्त्रिक समाजवादको पक्षमा लडिरहेको एक मात्र सशक्त पार्टी राष्ट्रिय जनमुक्ति पार्टी भएको पार्टीका केन्द्रीय अध्यक्ष केपी पालुङ्वाले ठोकुवा गरेका थिए ।
बहुजातीय लोकतन्त्रको पक्षमा सङ्र्घषरत सम्पूर्ण शक्ति एक भएर राष्ट्रिय जनमुक्ति पार्टी अघि बढ्ने समेत पालुङ्वाले प्रतिबद्धता व्यक्त गरेका छन् ।
राष्ट्रिय जनमुक्ति पार्टीका केन्द्रीय सचिव विष्णु थाम्देनका अनुसार लिम्बूवान समूहका सदस्यहरु राष्ट्रिय जनमुक्तिमा समायोजन हुनेहरुमा ताप्लेजुङ, झापा, इलाम, तेह्रथुम, मोरङ र सुनसरी गरी ५३ जनाको नामावलीसमेत उल्लेख गरेका थिए ।
तस्वीरः मोहन श्रेष्ठ