धरानः धरानमा रहेका सरकारी तथा निजी विद्यालयमा हप्ताको एकपटक जातीय पहिरन लगाउन प्रोत्साहन गर्नुपर्नेमा जोड दिइएको छ ।
धरान उपमहानगरपालिका आदिवासी जनजाति विकास समितिको बैठकमा यो कुरा उठेको हो । ‘धरान शहरलाई आदिवासी जनजातिको शहरको झल्को दिनको लागि हप्ताको एकदिन विद्यार्थीहरुलाई जातीय पहिरन लगाउन प्रोत्साहन गर्नको लागि नगरपालिकामार्फत् शिक्षा महाशाखामा पहल गर्ने निर्णय भएको छ’, अभियन्ता स्वर्णिमहाङ फोम्बोले भने ।
विशेषतः साना साना नानीहरुलाई पनि पहिचान झल्किने खालको के गतिविधि गर्ने भन्नेबारेमा छलफल हुँदा सो निर्णय भएको उनले जानकारी दिए । ‘विद्यालयले हप्तामा एकपटक पोशाक परिवर्तन गर्ने चलन छ’, उनले भने, ‘त्यस्तै यो पहिरनलाई पनि प्रोत्साहन गर्न सके राम्रो हुन्थ्यो र विद्यार्थीले पनि आफ्नो संस्कार, संस्कृतिबारे जान्ने अवसर हुन्थ्यो कि भन्ने हो ।’

बहुजातीय शिक्षालय स्थापना हुने
धरान उपमहानगरपालिकाले बहुजातीय शिक्षालय स्थापना गर्ने जनाएको छ । धरान उपमहानगरपालिकाका आदिवासी जनजाति विकास समितिका संयोजक नरेशकुमार इवारमले धरानले नयाँ नयाँ काम गरिरहनुपर्छ भनेर आगामी आव २०७८–७९ को नीति तथा कार्यक्रममै समेटेर लगिएको बताए । उनले मातृभाषा अध्ययन गरिने शिक्षालयकोरुपमा विकास गर्न बहुजातीय शिक्षालय स्थापना गरिने बताए । ‘धरानस्थित बहुजातीय सङ्ग्रहालयमा कोठाको व्यवस्थापन, शिक्षकलाई तलबको व्यवस्थापन गर्दै त्यहाँ पठनपाठन गर्ने भनेर लागेका छौं’, उनले भने, ‘शिक्षालयमा मातृभाषा अध्ययनको लागि मात्र नभई विभिन्न जातजातिको रितिथिति, सँस्कृति, रहनसहन, परम्परा र इतिहास अध्ययन गर्ने प्रतिष्ठानकोरुपमा विकास गरिनेछ ।’
कक्षाकोठामा शुरुवातदेखि भाषा अध्यन गराई मातृभाषामा दक्ष बनाइनेछ भने कक्षा कोठा सबै जातजातिहरुको साँस्कृतिक पहिचान झल्कने अनुसार निर्माण हुनेछ । शिक्षालयमा पढ्ने विद्यार्थीहरुको आर्थिकस्तर न्युन भएमा उनीहरुलाई सामुदायिक विद्यालयमा निःशुल्क अध्ययन गर्न छनौटको आधारमा सिफारिश गरिने उनले जानकारी दिए ।