धरानः राष्ट्रिय बाल दिवस २०७८ को अवसरमा सामुदायिक विकास मञ्च नेपाल धनकुटा र मानव अधिकार मञ्च नेपाल इलामको संयुक्त आयोजनामा शनिवार भएको धनकुटा जिल्लास्तरीय वक्तृत्वकला प्रतियोगितामा युएन, नवोदय कलेज धरानका दीपेन भण्डारी प्रथम भएका छन् ।
भर्चुअल माध्यमद्वारा भएको प्रतियोगितामा धनकुटाको महालक्ष्मी नगरपालिकास्थित जनता मावि का रवि पौडेल दोस्रो र पाख्रीबास नगरपालिकास्थित भारती माविकी कोपिला पोख्रेल तेश्रो बनिन् ।
प्रथम, दोश्रो र तेश्रो हुनेले क्रमशः २ हजार, १ हजार ५ सय र १ हजार नगद प्रदान गरिने आयोजकले जनाएको छ । आयोजकका अनुसार प्रथम हुने दीपेन भण्डारीले प्रदेशस्तरीय वक्तृत्वकला प्रतियोगितामा भाग लिने अवसर पाएका छन् ।
वक्तृत्वकलाको शीर्षक ‘कोरोना भाइरस (कोभिड–१९) ले बालबालिकाको शैक्षिक क्षेत्रमा पारेको असर र वैकल्पिक उपायहरु’ रहेको थियो ।
प्रतियोगितामा १८ वर्षमुनिका बालबालिकाहरु सहभागी गराइएको आयोजकले जनाएको छ । दीपेनले यसअघि रयाडिकल लाइट नेपाल प्रा.लि.धरानद्वारा आयोजित एसईई स्पीकर धरान–२०७८, सिजन–१ को बिजेता समेत भएका थिए । एसईई स्पीकरको बिजेता बनेपछि उनले युएन, नवोदय कलेजले प्रदान गरेको पूर्ण छात्रवृत्तिमा विज्ञान सङ्काय लिएर कक्षा–११ मा अध्ययनरत छन् ।