धरानः जनता समाजवादी पार्टीका वरिष्ठ नेता अशोक राईले पहिचानसहितको संघीयता आवश्यक रहेको बताएका छन् ।
संविधानलाई जनमुखी, वस्तुस्थितिअनुकुल खालको बनाएर पहिचानसहितको बनाउनुपर्ने उनले धारणा राखे । संगठन सुदृढीकरण तथा जनजागरण अभियान (सुज अभियान ) को लागि धरानको चुम्लुङ हिममा कार्यकर्तालाई प्रशिक्षण दिने क्रममा उनले यस्तो बताएका हुन् । उनले समाजवादी लचिलो संविधान बनाउनुपर्छ भन्ने पक्षमा रहेको बताए ।
नेता राईले हाल राष्ट्रियसभाले खर्च बढाएको समेत आरोप लगाए । ‘खर्च बढाउने मात्रै होइन’, उनले भने, ‘राज्यले आम्दानीको स्रोत पनि बढाउनुपर्छ ।’ उनले नेपालमा भ्रष्टाचार रोक्ने र घटाउने हो भने स्वतः खर्च घट्ने पनि बताए । भ्रष्टाचारिलाई कारवाही गर्ने निकाय भ्रष्टाचार निवारण आयोगले कारवाही गर्न नसक्ने भनेर कानुन बनाएर समेत भ्रष्टाचार गरिरहेको उनको भनाइ थियो ।
केपी ओलीले संघीयता नचाहिँदो भनिरहेको उनको आरोप थियो । नेपालमा सबै स्थानबाट आएर सबै जातजाति मानव बस्ती बस्न थालेको उल्लेख गर्दै विविधता भएको देशको लागि नै संघीयता आवश्यक नै भएको उनको भनाइ थियो । संघीयत भित्र स्वायत्त क्षेत्र, विशेष स्वायत्त तथा संरक्षित क्षेत्र समेत हुनुपर्ने उनको कथन थियो ।
जनता समाजवादीले भदौदेखि मंसिरसम्म संगठन विस्तार तथा जनजागरण अभियानलाई सुज अभियानको रुपमा अगाडि बढाएको छ । धरानमा सुनसरी जिल्ला प्रतिनिधिसभा निर्वाचन क्षेत्र १ का संयोजक दीपक मेन्याङ्बोको संयोजकत्वमा कार्यक्रम भएको हो ।
कार्यक्रममा पूर्व माओवादीका धरान ६ का टेकबहादुर गौतम, इटहरी १९ का मिलन राई र इटहरी १६ का सुमितविक्रम साह जनता समाजवादी पार्टी प्रवेश गरेका छन् ।