धरानः खेलमा रोमाञ्चक पुनःरागमन गर्दै नेपाल जारी प्रतिष्ठित साफ च्याम्पियनसीपको फाइनलमा ऐतिहासिक रुपमा पहिलोपटक प्रवेश गर्न सफल भएको छ ।
बुधबार लिग चरणको अन्तिम तथा निर्णायक मानिएको खेलमा बंगलादेशससँग १–१ गोलको बराबरी खेल्दै नेपालले दक्षिण एसियाली फुटबलको कुम्भमेलामा ऐतिहासिक सफलता हात पारेको हो ।
माल्दिभ्सको मालेस्थित नेशनल स्टेडियममा भएको खेलमा नेपाल पहिलो हाफमै पछि परेको थियो । बगंलादेशले खेलको आठौं मिनेटमा अग्रता बनाएको थियो। बंगलादेशका सुमन रेजाले हेडरमार्फत गोल गर्दै टोलीलाई अग्रता दिलाएका थिए ।
खेलको ८८ औं मिनेटमा अञ्जन विष्टले पेनाल्टीमा गोल गर्दै खेललाई बराबरीमा ल्याए । ८६ औं मिनेटमा अन्जनलाई बंगलादेशी खेलाडीले पेनाल्टी क्षेत्रभित्र लडाएपछि नेपालले पेनाल्टी पाएको थियो। त्यसमा गोल गर्दै अञ्जनले नेपाललाई ऐतिहासिक सफलता दिलाए ।
बंगलादेशलाई बराबरीमा रोकेसँगै नेपाल ७ अंकसहित शीर्ष स्थानमा रहँदै फाइनलमा पुगेको हो । दक्षिण एसियाली क्षेत्रको सबैभन्दा ठूलो फुटबल प्रतियोगितामा हालसम्म नेपाल सेमिफाइनलभन्दा अघि बढ्न सकेको थिएन ।

यसअघि नेपाल ५ पटक साफको सेमिफाइनलबाटै घर फर्किएको थियो । यसअघिको संस्करणमा पनि २०१८ मा नेपाल माल्दिभ्ससँग ३–० ले सेमिफाइनलमा पराजित हुँदै बाहिरिएको थियो । त्यसअघि सन् २०१३, २०११, १९९५ र १९९९ मा नेपाल सेमिफाइनलबाट बाहिरिएको थियो ।
नेपालले अब उपाधिका लागि ३० गते भारत र माल्दिभ्सबीचको विजेतासँग खेल्नेछ । आजै हुने दोस्रो खेलमा भारत र माल्दिभ्स भिड्दैछन् ।
भारतलाई स्पष्ट जितको आवश्यक्ता हुँदा माल्दिभ्सलाई बराबरी नै पर्याप्त हुनेछ ।
माले सिटी स्थित नेशनल फुटबल स्टेडियममा भएको खेलमा फाइनल प्रवेशका लागि नेपाललाई जित वा बराबरीको खाँचो थियो भने बंगलादेशलाई जित वाहेक अर्को विकल्प थिएन ।
खेलमा बंगलादेशले सनसनीपुर्ण अग्रता समेत बनाएको थियो । ऐतिहासिक फाइनलमा पुगेको नेपालले अब १७ अक्टुबरका दिन उपाधि भिडन्तका लागि फेरि मैदानमा उत्रिनेछ । बुधबार रासत नै हुने गत संस्करणका दुई फाइनिलस्ट टिम बिजेता माल्दिभ्स र उपविजेता भारतबीचको खेलको नतिजाले यस संस्करणको फाइनल खेल्ने दोस्रो टोलीको टुंगो लाग्नेछ ।