धरानः क्रिस्टियानो रोनाल्डोले प्रभावशाली प्रदर्शन गरेको प्रिमियर लिगको शनिबारको खेलमा म्यानचेस्टर युनाइटेड विजयी भएको छ । अघिल्लो चार खेलमा जित विहिन रहेको युनाइटेडले टोटेनहमलाई ३–० ले हराएको छ ।
खेलको ३९ औं मिनेटमा रोनाल्डोले गोल गर्दै युनाईटेडलाई सुरुआती अग्रता दिलाएका थिए । ब्रुनो फर्नान्डेजको पासमा रोनाल्डोले उत्कृष्ट गोल गरेका थिए ।
खेलको ६४ औं मिनेटमा एडिन्सन काभानीले गोल गर्दै युनाईटेडलाई २-० को अग्रता दिलाए । उनले रोनाल्डोको पासमा गोल गरेका हुन् । त्यसपछि खेलको ८६ औं मिनेटमा मार्कुस राषफोर्डले गोल गर्दै युनाईटेडलाई ३-० को जित दिलाए ।
जितपछि १७ अंक पुगेको युनाइटेड अंक तालिकाको पाँचौं स्थानमा उक्लेको छ । टोटेनहम १५ अंकसहित आठौं स्थानमा छ । शनिबार अर्को खेलमा म्यानचेस्टर सिटी क्रिस्टिल प्यालेससँग २–० ले स्तब्ध भयो । अर्को खेलमा लिभरपुल भने ब्राइटन एण्ड होभ अल्बाइनसँग २–२ को बराबरीमा रोकियो । शीर्षस्थानको चेल्सीले न्युक्यासललाई ३–० ले र आर्सनलले लेस्टरलाई २–० ले हरायो ।