विराटनगरः कोरोना भाइरसबाट संक्रमित भएका विराटनगर अस्पतालका डाक्टरको सम्पर्कमा आएका थप चारजनामा संक्रमण पुष्टि भएको छ ।
गएको मंगलबार संक्रमण पुष्टि भएका ६५ वर्षीय डाक्टरको सम्पर्कमा आएका चारजनाको रिपोर्ट पनि पोजेटिभ आएको हो । कार्यरत चारजना नर्समा कोरोना संक्रमण पुष्टि भएको हो । संक्रमित स्वास्थ्यकर्मी विराटनगर ५, १० नम्बर वडाका हुन् भने एकजना धरान घर भएकी छिन् । अर्का एकजना कोशी अस्पतालकी रहेको पाइएको महानगरपालिका स्वास्थ्य महाशाखा प्रमुख रमेश कार्कीले जानकारी दिए ।
गएको मंगलबार अस्पतालका ६५ वर्षीय चिकित्सकमा पहिलोपटक संक्रमणको पुष्टि भएको थियो । संक्रमण थाहा पाएपछि उनी सम्पर्कविहीन भएका थिए । झण्डै ३८ घण्टापछि महानगरको सम्पर्कमा आएका उनी शुक्रबार राति धरानस्थित बीपी कोइराला स्वास्थ्य विज्ञान प्रतिष्ठानमा भर्ना भएका थिए । एक रात बीपीमा भर्ना भएका उनी शनिबार काठमाडौँको शिक्षण अस्पतालमा भर्ना भएका छन् । महानगरले विराटनगर अस्पतालमा आवतजावत रोक्ने गरी शिलबन्दी गरेको छ ।