विराटनगरः विराटनगरमा थप चारजनामा कोरोना संक्रमण पुष्टि भएको छ ।
विराटनगर चाँदनी चोक क्षेत्रका तीन जनामा बुधबार कोरोना संक्रमण पुष्टि भएको वडाध्यक्ष मिनकुमार आचार्यले जानकारी दिए । यसै गरी अर्का संक्रमित विराट नर्सिङ होममा कार्यरत कर्मचारीको आमा भएको बताइएको छ । उनलाई छोराबाट संक्रमण भएको हुनसक्ने भन्दै थप कन्ट्रयाक्ट ट्रेसिङको काम सुरु गर्ने तयारी भइरहेको वडाध्यक्ष आचार्यले बताए ।
बुधबार बिहानको रिपोर्टमा २२, २७, ५६ वर्षीया महिला र ५२ वर्षीय पुरुषमा संक्रमण भएको हो । हालसम्म महानगरपालिकामा संक्रमित संख्या १ सय ६२ पुगेको बताए । जसमध्ये ३१ जना संक्रमित उपचारपछि घर फर्किसकेका छन् ।
लकडाउनलाई पूर्णरुपमा पालना गर्न र अनावश्यक हिँडडुल नगर्न विराटनगरबासीलाई आग्रह गरिएको छ ।