धरानः सर्वोच्च अदालतले सरकारको सिफारिसमा राष्ट्रपति विद्यादेवी भण्डारीले गरेको प्रतिनिधिसभा विघटनको निर्णय उल्ट्याइदिएपछि धरानमा खुशीयाली छाएको छ ।
प्रचण्ड–नेपाल समूहका नेता–कार्यकर्ताहरु भानुचोकमा निस्किएर दीप प्रज्ज्वलन समेत गरे । पटका पनि पड्काए । प्रतिनिधिसभा पुनःस्थापनाको स्वागतमा प्रचण्ड–माधव पक्ष दीप प्रज्वलन गरेका हुन् । कार्यक्रममा बोल्दै सांसद जयकुमार राईले सर्वोच्चले सही पक्षमा फैसला गरेको बताए । कार्यक्रममा बोल्दै नेकपाका नेता नारायण सुवेदीले केपी ओलीले संसद् विघटन गरेर प्रतिगामी कदम चालेको तर अहिले सर्वोच्चले उल्टयाएर जनताको भावनाको कदर गरेको बताए ।
नेता–कार्यकर्ताले सर्वोच्च अदालत हाइहाइ, केपी ओली बाइबाइलगायतका नारा पनि लगाएका थिए । कार्यक्रममा नेता अइन्द्रविक्रम बेघाले सर्वोच्च अदालत हाइहाइ भन्दै नारा लगाए भने नेता राजमणि निरौलाले सबैलाई टिका लगाइदिएका थिए ।
प्रधानमन्त्री केपी शर्मा ओलीले पार्टीभित्रको विवाद उत्कर्षमा पुगेपछि वैशाख १७ र २७ गते नयाँ निर्वाचन गर्ने घोषणा गर्दै प्रतिनिधिसभा विघटन गर्ने निर्णय गरेका थिए । सो निर्णयविरूद्ध सर्वाेच्च अदालतमा १३ रिट दर्ता भएको थियो । ती रिटमाथि संवैधानिक इजलासमा लामो बहस भएको थियो । आज प्रधानन्यायाधीश चोलेन्द्र शमशेर राणा सम्मिलित संवैधानिक इजलासले पुस ५ को सरकारी निर्णय उल्ट्याउँदै संसद् पुनस्थापना गर्ने फैसला सुनाएको हो । प्रधानन्यायाधीशसहित पाँच जना न्यायाधीश रहेको संवैधानिक इजलासले प्रतिनिधि पुनस्थापना गर्ने निर्णय गरेको हो ।
फैसलामा १३ दिनभित्र प्रतिनिधिसभा बैठक बोलाउन आदेश समेत दिइएको छ । ‘संविधानको धारा ७६ को १ अनुसारको बहुमतको प्रधानमन्त्रीले धारा ७६ को ७ अनुसार संसद विघटन गर्ने संवैधानिक पूर्वसर्त अवस्था नभएको र प्रधानमन्त्रीले पुस ५ गते सिफारिस गरी राष्ट्रपतिले स्वीकृत गरी जारी गरेको विज्ञप्ति असंवैधानिक भएकोले संवैधानिक र कानुनी रूपमा शुन्य हुने गरी बदर गरिएको छ,’ फैसला सुनाउँदै प्रधानन्यायाधीश राणाले भने ।