धरानः प्रधानमन्त्री केपी शर्मा ओलीले निर्वाचनका लागि सबै दललाई सरकारमा सहभागी हुन आग्रह गरेका छन् ।
उनले गरेको संसद् विघटन र चुनावको घोषणालाई प्रतिगमन भएको भन्नु गलत भएको दोहोरयाउँदै यस्तो आग्रह गरेका हुन् ।
यसअघि पनि पटक पटक पत्रकार सम्मेलन गर्दै उनले यस्तै सार्वजनिक आव्हान गर्दै आएका थिए । शुक्रबार राष्ट्रको नाममा सम्बोधन गर्दै उनले यस्तो दलिल दोहोरयाएका हुन् ।
प्रधानमन्त्री ओलीले आफ्नो नेतृत्वमा चुनावी सरकार बनाउन प्रस्ताव गरेका हुन् । उनले आफू नेतृत्वको सरकारलाई चुनावी सरकार बनाउने र यही सरकारमा सबै राजनीतिक दल सहभागी हुन प्रस्ताव गरे । ताजा जनादेशमा जाने कुरा प्रतिगमन नभएको भन्दै उहाँले एक पटक फेरि ताजा जनादेश लिएर सरकार सञ्चालन गर्नुपर्ने बताए ।
प्रधानमन्त्री ओलीको सिफारिसमा राष्ट्रपति विद्यादेवी भण्डारीले प्रतिनिधि सभा विघटन गर्दै आउँदो कात्तिक २६ र मङ्सिर ३ गतेका लागि मध्यावधि चुनाव तोकेका छन् ।
यस विषयमा सर्वोच्च अदालतमा रिट निवेदन दर्ता भएको छ । यसबारेको बहस संवैधानिक इजलासमार्फत सुरु भएको छ । सरकार बचाउन अन्य दललाई फुटाउने काम गर्नु अनैतिक कार्य भएको पनि उनले जनाएका छन् ।
जबकि सरकार टिकाउन अरू दल फुटाउने सर्वाधिक धेरै प्रयत्न गरेको आरोप उनीमाथि छ । प्रतिनिधिसभा पुरै अवधि चलोस् भन्नेमा आफूले कुनै कसर बाँकी नराखेको उनले बताए ।