धरानः प्रधानमन्त्री केपी शर्मा ओलीले मन्त्रिपरिषद् विस्तार गर्ने भएका छन् ।
खगराज अधिकारी गृहमन्त्री बन्ने पक्कापक्की रहेको बालुवाटार स्रोतले सूत्रन्यूजलाई बतायो ।
त्यस्तै नारदमुनी राना वनमन्त्री, मोहन बानिया बिनाविभागीय, नैनकला थापा सञ्चारमन्त्री, ज्वालाकुमारी शाह कृषिमन्त्री, राजकिशोर यादव उद्योगमन्त्री, गणेश पहाडी सामान्य प्रशासन मन्त्री र आशा विक वन राज्यमन्त्री बन्ने भएका हुन् ।
यो ओलीले गर्न लागेको १९ औं मन्त्रिपरिषद बिस्तार हो ।
मन्त्रीहरूको सपथ आजै ४ बजे राष्ट्रपति कार्यालय शितलनिवासमा हुने बताइएको छ । यसअघि अघिल्लो साता प्रधानमन्त्री ओलीले पुरानो मन्त्रिमण्डलका चार जनाबाहेक सबैलाई हटाएर मन्त्रिमण्डल पुनर्गठन गरेका थिए। जनता समाजवादी पार्टीको महन्थ(राजेन्द्र समूहलाई लिएर गरिएको उक्त मन्त्रिपरिषद् विस्तारबारे सर्वोच्च अदालतमा मुद्दा विचाराधीन छन्।