धरानः दक्षिण कोरियाले नेपाली श्रमिक लैजान नेपालसामु सर्त राखेको छ ।
लैजाने प्रक्रिया कोरोना संक्रमणको सुरुवातसँगै रोकिएको थियो । कोरियाले नेपालबाट सीधै कोरिया उडान हुनुपर्ने, त्यहाँ पुगेर कोरोना बिमा गर्नुपर्ने र त्यहाँ श्रमिकले आफ्नै खर्चमा क्वारेन्टिन बस्नुपर्ने सर्त राखेको जनाइएको छ । सर्त पूरा गर्ने भएमा श्रमिक लैजाने प्रक्रिया अगाडि बढाउने वैदेशिक रोजगार विभागका महानिर्देशक कृष्णप्रसाद दवाडीले बताए ।
मन्त्रालयका प्रवक्ता दीपक काफ्लेले कोरियाको सर्त अनुसारका धेरै काम भइसकेको र कतिपय श्रम सम्झौता हुँदाकै विषयमा पनि प्रगति भइरहेकाले छिट्टै कोरियाको रोजगारी खुल्ने विश्वास व्यक्त गरे । सरकारले गत साता दक्षिण कोरियामा पनि नियमित उडान सुरु गर्ने निर्णय गरिसकेको छ ।
कोरोना माहामारीका कारण गत वर्ष सरकारले अन्तर्राष्ट्रिय उडान बन्द गरेसँगै दक्षिण श्रमिक कोरिया जान पाएका छैनन् । करिब ७ हजार नियमित र पुनः जान लागेका ३ हजार श्रमिक जान नपाएको मन्त्रालयले जनाएको छ ।
भाषा पास गरेर सबै प्रक्रिया पूरा गरेपनि कोरिया जान नपाउँदा उनीहरुले पटक पटक सरकारको ध्यानाकर्षण गराउँदै आएका थिए ।