धरानः राष्ट्रिय परीक्षा बोर्डले यो वर्षको माध्यमिक शिक्षा परीक्षा एसईईको तयारी थालेको छ । परीक्षा नियन्त्रक अर्जुन रायमाझीले परीक्षाको तयारी थालिएको जानकारी दिए ।
उनकाअनुसार आउँदो बैशाख २० गतेभित्रै परीक्षा सक्ने गरी तयारी थालिएको छ । बैशाख ३० गते पालिकाको चुनावको मिति तोकिएकाले २० गतेभित्रै परीक्षा सकाउनुपर्ने दबाब राष्ट्रिय परीक्षा बोर्डलाई परेको छ ।
बुधबार वा बिहीबारसम्ममा परीक्षाको तालिका प्रकाशित गर्ने तयारी भएको उनले जानकारी दिए ।
चुनावमा शिक्षक र कर्मचारी पनि खटिने भएकाले चुनाव अघि नै परीक्षा सक्ने गरी तयारी थालिएको परीक्षा नियन्त्रक रायमाझीले बताए । यो वर्ष झण्डै ५ लाख ८ हजार विद्यार्थीले परीक्षा दिने अनुमान छ । विद्यार्थीको पढाइ पूरा गर्न चैतसम्म कक्षा सञ्चालन गर्ने र बैशाखमा परीक्षा गर्ने तयारी गरिएको हो । यस्तै, बोर्डले जेठमा कक्षा १२ को परीक्षा गर्ने तयारी गरेको छ ।