धरानः राष्ट्रिय परीक्षा बोर्डका अध्यक्ष महाश्रम शर्माले एसइईको परीक्षा प्रदेश सरकारलाई दिने गरी कानुन निर्माण गरिरहेको बताएका छन् ।
बिहीबार शिक्षा पत्रकार नेपाल (इजोन)ले काठमाडौंमा आयोजना गरेको परीक्षासम्बन्धी अन्तरक्रिया कार्यक्रममा बोल्दै अध्यक्ष शर्माले यस्तो बताएका हुन् । ऐनमा व्यवस्था नभई सबै कुराहरू प्रदेश सरकारलाई दिन कानुनतः अफ्ठ्यारो भएको उल्लेख गर्दै सरकारले प्रदेशलाई अधिकार दिने कानुन पारित गरे प्रदेश सरकारले नै एसइईको परीक्षा लिने उनको भनाइ छ । अध्यक्ष शर्माले प्रदेश सरकारले सो अधिकार पाएमा प्रदेशले उत्तरपुस्तिका परीक्षण गरिसकेपछि आफ्नो समयानुसार नतिजा प्रकाशन गर्नसक्ने पनि बताए ।
उनले अधिकार प्रदेशलाई हस्तान्तरण गर्ने प्रस्ताव अगाडि सारेको बताए । उनले प्रस्ताव मन्त्रिपरिषद्मा पुरयाइएको छ । ‘परीक्षा खारेज गर्नु हुँदैन’ उनले भने, ‘परीक्षाको सबै अधिकार प्रदेशस्तरलाई दिइनेछ । पहिले देशभरिको नतिजा एकैपटक सार्वजनिक हुन्थ्यो । तर अब प्रस्ताव स्वीकृत भएपछि जुन प्रदेशले छिटो उत्तरपुस्तिका परीक्षणको काम सक्छ उसले पहिले नतिजा सार्वजनिक गर्न सक्नेछ । प्रदेशले आआफ्नै अनुकूलअनुसार नतिजा सार्वजनिक गर्नसक्नेछन् ।’
उनका अनुसार प्रदेशले नतिजा सार्वजनिक गरेपछि त्यसलाई बोर्डमा पठाउनुपर्ने हुन्छ र बोर्डले नतिजालाई प्रमाणीकरण गर्नेछ ।