धरानः धरानमा लकडाउनमै पनि लागूऔषधको कारोबार हुने गरेको खुलेको छ ।
प्रहरीले धरान–१३ बाट युवतीसहित दुईजना समातिएपछि यो रहस्य खुलेको हो । धरान–१३ बाट नियन्त्रित लागूऔषध ब्राउनसुगर र लागूऔषध ट्याब्लेट सहित ३ जना परेका छन् । धरान–१३ को एक घरबाट लागूऔषध बेचबिखन भइरहेको भन्ने गोप्य सूचनाका आधारमा इलाका प्रहरी कार्यालय धरानबाट खटिएको प्रहरी टोलीले पक्राउ गरेको डिएसपी ढुण्डीराज न्यौपानेले जानकारी दिए ।
धरान–१३ की २६ वर्षीया युवती समिया लिम्बू, धरान–१३ कै २९ वर्षीय मन्दिप मगर र धरान–१५ का ४३ वर्षीय घनश्याम राईलाई ३ ग्राम ब्राउनसुगर र १५० ट्याबलेट नाइट्रोजन तथा ८३ हजार नगदसहित पक्राउ गरिएको उनले जानकारी दिए । पक्राउ परेका तिनैजनाको सम्बन्धमा थप अनुसन्धान भइरहेको उनले जानकारी दिए ।
उता जंगली च्याउ खाएर बिरामी
संखुवासभाको खाँदवारी नगरपालिका–२ खोरियाटोल बस्ने ७२ वर्षीया बृद्धा जंगली च्याउ खाएर बिरामी भएकी छन् । शनिवार दिउँसो आफ्नै बारीमा उम्रिएको च्याउ पकाएर खाँदा ७२ वर्षीया निर माया विक बिरामी भएकी हुन् । बिरामी भएकी विकको जिल्ला अस्पताल खाँदवारीमा उपचार भइरहेको छ ।