धरानः सरकारले अहिले नै देशव्यापी रुपमा लकडाउन गर्ने कुनै योजना नबनाएको जनाएको छ ।
मन्त्रिपरिषद्को बैठकको निर्णय सार्वजनिक गर्दै सरकारका प्रवक्ता तथा अर्थ, सञ्चार तथा सूचना प्रविधि मन्त्री युवराज खतिवडाले संक्रमण कम देखिएको ठाउँमा क्रमशः खुकुलो पार्दै लैजाने र संक्रमण बढी देखिएको ठाउँमा केही प्रतिबन्ध रहने बताए । लकडाउन भइहाल्ने हो कि भनेर नआत्तिन तर संयममता भने अपनाउन मन्त्री खतिवडाले बताए ।
मन्त्री खतिवडाले भने, ‘अहिलेलाई सरकारले जे निर्णय गरेको छ, त्यति नै बुझौं । चैत १० गते रातिदेखि लकडाउन भनेर जसरी गएका थियौं, त्यो विधिबाट जानेतर्फ अहिले सरकारले सोचेको छैन । आवश्यक परे पालिका र स्थानीय प्रशासनले पनि यो कदम चाल्न सक्छ । यहीअनुसार दुई दर्जनभन्दा बढी ठाउँमा कुनै न कुनै रुपको लकडाउन त गरिएकै छ ।
उनले कोरोना संक्रमण बढेको क्षेत्रमा जिल्ला प्रशासन कार्यलयमार्फत लकडाउन जारी हुनसक्ने स्पष्ट पारेका छन् । ‘जुन जिल्लामा बढेको छ त्यहाँ स्थानीय तहको रुपमा होस् वा जिल्लाको तहमा होस् कडाइका साथ जाने । कतिपयले त लकडाउन गरेरै जानुभएको छ, यो हामीले देखेकै कुरा हो । त्यसैले हामी छनौटपूर्ण ढंगबाट यो समस्या समाधान गर्दै जाने हो ।’ उनले भने ।
उनले अहिले बढेको संक्रमणको जोखिमले अति उद्दार भएर सार्वजनिक बस खोल्ने, विद्यालय खोल्ने, विमानस्थल खोल्ने अवस्था नरहेको बताए ।