धरानः मनसुनको न्यूच चापीय रेखा नेपालतिर नजिक रहेकोले आज (मंगलबार) धेरै ठाउँमा वर्षाको सम्भावना देखिएको मौसमविद्ले बताएका छन् ।
मौसम पूर्वानुमान महाशाखाकी मौसमविद् विभूति पोखरेलले अहिले (बिहान) पनि प्रदेश १, बागमती, गण्डकी र कर्णाली प्रदेशका केही स्थानमा वर्षा भइरहेको छ ।
यस्तै, मनसुन अन्तिम अवस्थातिर पुगेकाले आज दिउँसो पनि देशका धेरै स्थानमा मेघगर्जनरचट्याङसहित हल्कादेखि मध्यम वर्षा हुने सम्भावना छ । यो सम्भावना पूर्वदेखि पश्चिमसम्मै रहेको मौसमविद् पोखरेलले जानकारी दिइन् । यसैगरी दिउँसो प्रदेश १, प्रदेश २, बागमती प्रदेश, गण्डकी प्रदेश र प्रदेश ५ का थोरै स्थानमा भारी वर्षाको सम्भावना छ । यो भनेको यी हरेक प्रदेशका थोरै थोरै स्थानमा ठूलो वर्षा हुने सम्भावना हो ।
मौसमविद् पोखरेलका अनुसार मनसुनको न्यून चापीय रेखा सोमबार बेलुकादेखि पूर्वतर्फबाट नेपालको नजिक भएको हो । अहिले यो मध्य भूभागसम्म फैलिसेककेको छ भने बिस्तारै पश्चिमतिर पनि फैलिने क्रममा छ । यसैको प्रभावले अब कम्तीमा ३ दिन देशमा अलि धेरै स्थानमा वर्षा हुने सम्भावना बढेको हो ।