धरानः सत्तारुढ नेकपाभित्रको पछिल्लो विवादले पार्टी विभाजनको खतरा बढेपछि दोस्रो तहका नेताहरु विवाद समाधान गर्न सक्रिय भएका छन् ।
पार्टी महासचिव विष्णुप्रसाद पौडेल, स्थायी कमिटी सदस्यहरु सुवासचन्द्र नेम्वाङ, प्रदीप ज्ञवाली, शंकर पोखरेल, देवेन्द्र पौडेल लगायतका नेताहरु दुवै समूहलाई मिलाउने प्रयासमा जुटेका हुन् । पार्टीका अरु नेता र कार्यकर्ताले पनि पार्टी विभाजनतर्फ जान नदिन शीर्ष नेताहरुलाई खबरदारी गरेका छन् ।
अध्यक्षद्वय केपी शर्मा ओली र पुष्पकमल दाहाल प्रचण्ड पनि आफू निकटका नेताहरुसँग औपचारिक तथा अनौपचारिक छलफलमा जुटेका छन् । पछिल्लो पटक मन्त्रिपरिषद् पुनर्गठन, कर्णाली प्रदेशको विवाद र प्रधानमन्त्री ओलीले भारतीय गुप्तचर संस्था रअका प्रमुखसँग भेटघाट गरेको विषयलाई लिएर नेकपाभित्र फेरि विवाद चर्किएको हो ।
हिजोको भेलामा वरिष्ठ नेताद्वय झलनाथ खनाल, माधवकुमार नेपाल, उपाध्यक्ष वामदेव गौतम, प्रवक्ता नारायणकाजी श्रेष्ठ र सचिवालय सदस्य रामबहादुर थापा सहभागी थिए ।
ओलीले यस्तो प्रस्ताव गरेपछि आइतबार दाहालले आफू निकटका नेताहरूसँग यसबारे ब्रिफ्रिङ गरेका थिए । त्यसयता नेकपाभित्रको विवाद लगातार उत्कर्षतर्फ लागेको छ । पार्टीका जिम्मेवार नेताहरूले नै फेसबुकबाट एकता जोगाउन आग्रह गरिरहेका छन्रु भने कार्यकर्ताहरूबीच रस्साकस्सी चलिरहेको छ ।
पार्टीभित्रको विवादले शीर्ष नेताहरूबीच विमति देखिएको भएपनि पार्टी एकतालाई जोगाइ राख्नुपर्ने स्थायी कमिटी सदस्य रघुजी पन्त बताउँछन् । नेकपाको केन्द्रीय सदस्य रामकुमारी झाँक्रीले पार्टी फुटबाट जोगाउन सबैको भूमिका उत्तिकै रहेको बताउँछिन् ।
नफुटाऔंः नारायणकाजी
नेकपाका प्रवक्ता नारायणकाजी श्रेष्ठले पार्टीलाई विभाजन हुनबाट जोगाउन सबै लाग्नुपर्ने बताएका छन् ।
सोमबार बिहान आफ्नै निवासमा कुरा गर्दै प्रवक्ता श्रेष्ठले पार्टीभित्र देखिएको मतभिन्नतालाई अन्त्य गरी एकतालाई कायम राख्न सबैका बीच संवाद हुनुपर्ने बताए । उनले भने, ‘हामीले ठूलो मेहनेत गरेर पार्टी एकता गरेको हो । बैठक राखेर सबै पाटापक्षमा छलफल गरौं, खुला ढंगले छलफल गरौं र पार्टी एकताको निम्ति प्रयत्न जारी राखौं, पार्टी एकता कायम गर्नैपर्छ ।’