धरानः उपप्रधानमन्त्री तथा शहरी विकास मन्त्री राजेन्द्र महतोले नेपाल बहुल राष्ट्रिय राज्य नै रहेको भन्दै प्रतिक्रिया दिएका छन् । पदभारका क्रममा उनले नेपाल बहुल राष्ट्रिय राज्य रहेको बताएपछि उनी आलोचित बनेका थिए ।
शनिवार जनता समाजवादी पार्टीको महन्थ ठाकुर पक्षले आयोजना गरेको स्वागत कार्यक्रममा बोल्दै महतोले नेपाल बहुल राष्ट्रिय राज्य रहेको भन्दै आफ्नो भनाइ दोहोर्याएका हुन् ।
‘नेपाल विभिन्न भाषाभाषी, जातजातिहरू बस्ने देश हो, त्यसैले यो बहुल राष्ट्रिय राज्य नै हो,’ महतोले भने यसमा विवाद गर्नुपर्ने कुनै कारण छैन ।
आफ्नो पार्टी कांग्रेस र कम्युनिष्टजस्तो नभएको महतोले बताए । कांग्रेस र कम्युनिष्टले गर्न नसकेको काम गर्नका लागि पार्टी स्थापना भएको भन्दै उनले समाजमा व्याप्त शोषण र उत्पीडन समाप्त गर्ने लक्ष्य रहेको उल्लेख गरे ।
‘हाम्रो पहिलो दायित्व र रुझान भनेको पार्टीको मूल्य-मान्यता हो । हामी २४ घन्टा नै त्यसलाई याद राख्ने छौं ।’ महतोले भने ।
हाम्रो कोशी आवाज
