धरानः बेलायत सरकारले पहिलो पटक गोर्खा भर्ती रोकेको छ । बेलायत सेनाले शनिबार विज्ञप्ति प्रकाशित गर्दै गोर्खा भर्ती स्थगित गर्नुपरेको जनाएको छ । बेलायतले प्रदेश नम्बर १ को धरान र गण्डकी प्रदेशको पोखराबाट गोर्खा भर्ती लिंदै आएको थियो ।
बेलायत सेनाका बिग्रेड अफ गोर्खाका प्रमुख कर्नेल रिचर्ड गुडम्यानले शनिबार विज्ञप्ति प्रकाशित गरी कोरोनाकै कारण वर्षेनी गरिँदै आएको गोर्खा भर्ती स्थगित गर्नुपरेको जनाएका छन् । बेलायती सेनाले गोर्खा भर्तीका लागि २१ मेदेखि १० जुनलाई पोखरा र २३ मे देखि १० जुनसम्म नयाँ नाम दर्ताका लागि मिति तोकेको थियो ।
विश्वव्यापी रुपमा फैलिएको कोभिड–१९ का कारण बेलायतले पहिलो पटक गोर्खा भर्ती रोकेको हो । धरानको क्षेत्रीय छनोट २१ सेम्टेम्बरदेखि १८ अक्टोबर र पोखराको ९ अगस्टदेखि सेप्टेम्बर १० सम्म छनोट मिति तोकिए पनि कोराना संक्रमणका कारण स्थगित भएको हो । यसपटक भर्ती बन्द भएपनि अवस्था सहज भएमा गत वर्ष उत्तम अंक ल्याएर असफल भएकाहरुलाई मौका दिने बताएको छ ।