धरानः सिन्धुपाल्चोकमा भोटेकोशी र याल्मो नदीमा आएको बाढीले बगाउँदा दुईजनाको मृत्यु भएको छ ।
बाह्रबिसे ५ जम्बुका दुई जनाको शव भेटिएको छ भने १८ जना बेपता भएका छन् । जम्बुमा केही घर बगाएको स्थानीयले जानकारी दिएका छन् ।
जम्बु बाह्रबिसे बजारबाट करीब ३ किलोमिटर माथि पर्दछ । बाह्रबिसे नगरपालिका ३ खागदलमा बाढीले कच्ची र पक्की गरी २० घर बगाएको छ । बाढीले एक स्कर्पियो, एक ट्रक र एक पानी बोक्ने ट्याक्कर बगाएको जिल्ला प्रहरी कार्यालयका डिएसपी माधव प्रसाद काफ्लेले जानकारी दिए ।
उनका अनुसार बाह्रबिसे नगरपालिका भन्दा माथि खागदल पुल बगाएको छ । पुल बगाउँदा बाह्बिसे माथि र तलको सम्पर्क टुटेको छ । जसका कारण बाढीले क्षति पुरयाएको जम्बुमा प्रहरी पुग्न सकेको छैन् । मध्य भोटेकोशीको निर्माण स्थल पनि बाढीका कारण ध्वस्त भएको छ ।

सिन्धुपाल्चोकको बाह्रबिसे नगरपालिकाका प्रमुख (मेयर) निमफुन्जो शेर्पाले विभिन्न स्थानीय खोलामा उर्लिएको बाढीले ठूलो जनधनको क्षति भएको जानकारी दिएका छन् ।
मेयर शेर्पाले विभिन्न वडामा गरी बाढीले कम्तीमा २४ घर बगाएको, २ जनाको मृत्यु भएको र १८ जना बेपत्ता भएको जानकारी दिए । ‘अहिले म नेपाली सेनाको उद्धार टोलीसँगै घटनास्थलमा छु, उद्धारमा व्यस्त छु, संक्षिप्तमा भन्दा बाह्रबिसे नगरपालिका वडा नम्बर ३ स्थित प्रहरी कार्यालयदेखि केही अगाडि अरनिको राजमार्ग क्षतिग्रस्त भएको छ, वडा नम्बर ९ स्थित पक्की पुलमा क्ष्ति पुगेको छ, वडा नम्बर ५ र ३ मा १२–१३ वटा घर बगाएको छ, मानवीय क्षति भएको छैन,’ उनले भने, ‘यसैगरी वडा नम्बर ७ र ८ को बीचमा रहेको आँधी खोलाको बाढी बस्तीमा पस्दा ११ घर बगाएको छ, २ जनाको लास भेटिएको छ, १८ जना बेपत्ता छन् ।’