धरानः नेपाली कांग्रेसका सभापति शेरबहादुर देउवाले संवैधानिक परिषद्सम्बन्धी नयाँ अध्यादेश ल्याएर सर्वसत्तावादी सोंचतर्फ अघि बढेको आरोप लगाएका छन् ।
संसद् अधिवेशन छलेर संवैधानिक परिषद्सम्बन्धी अध्यादेश ल्याउनु अलोकतान्त्रिक भएको उनको भनाइ थियो । ‘सरकारको यस कदमबाट सर्वसत्तावादी सोच झनै प्रष्ट भएको छ’, उनले भने, ‘उपसभामुख पद खाली राखेर, सभामुख जस्तो गरिमामय व्यक्तित्वलाई विश्वासमा नलिइ कोरम पुगेन भन्नु हास्यास्पद छ । यसमा नेपाली कांग्रेसको प्रष्ट विमति छ ।’
उनले सामाजिक सञ्जाल ट्वीटरमा सो कुरा लेखेका छन् । राष्ट्रपति विद्यादेवी भण्डारीले संवैधानिक परिषदसम्बन्धी अध्यादेश जारी गर्नुभएको हो । मन्त्रिपरिषद्को सिफारिसअनुसार नेपालको संविधानको धारा ११४ को उपधारा १ बमोजिम राष्ट्रपति भण्डारीले संवैधानिक परिषद् (काम, कर्तव्य र अधिकार) सम्बन्धी (पहिला शंसोधन) अध्यादेश २०७७ जारी गरेकी छिन् । नयाँ अध्यादेश राजपत्रमा पनि प्रकाशित भइसकेको छ । अध्यादेश अनुसार अब अध्यक्षसहित बहाल रहेका बहुमत संख्याको आधारमा बैठक बस्न सक्नेछ ।