धरानः नेपाल कम्युनिष्ट पार्टी (नेकपा)का महासचिव नेत्रविक्रम चन्द ‘विप्लव’ले सबैसँग हातेमालो गरेर अगाडि जाने कुरामा आफूहरु तयार रहेको बताएका छन् ।
‘घुम्दै घुम्दै रुम्जाटार’ पुग्ने अनि घोडा चढ्ने अवस्था अब आउन नहुने पनि उनको तर्क थियो । ‘हामी सबैसँग हातेमालो गर्न तयार छौं तर विदेशीले हस्तक्षेप गरे हामी झुक्दैनौं,’ उनले भने ।
राष्ट्रिय सभागृहमा शुक्रबार आयोजित ‘नेपाल सरकार र नेपाल कम्युनिस्ट पार्टीबीच सम्पन्न सहमतिमा हस्ताक्षर कार्यक्रम’मा सम्बोधन गर्दै उनले आजको दिन नेपाली राजनीतिक आन्दोलनको नयाँ दिनका रुपमा अंकित भएको बताए ।
‘यो सहमति केवल नेपाल सरकार र नेपाल कम्युनिस्ट पार्टीको मात्र कुरा होइन,’ उनले भने, ‘केही नेताहरुको कुरामात्र होइन, सहमतिभित्र लुकेको महान आकांक्षा छ ।’ उनका अनुसार यो सहमतिभित्र नेपाललाई सुन्दर बनाउने सपना छ । ‘दिगो शान्ति, स्थिरता, समृद्धिको आकांक्षा र युवामा हुर्किएको समृद्ध जीवनको चाहना छ,’ उनले भने ।
‘विप्लव’ ले युद्धको अन्त्य कम्युनिष्टले गर्न सक्ने बताएका छन् । ‘विश्वमा युद्धको अन्त्य कसैले गर्छ भने कम्युनिष्टले गर्न सक्छ । कम्युनिष्ट जुन दिन विजय हुनेछ, सम्पूर्ण संसारमा हतियार र युद्धको अन्त्य हुन्छ’, उनले भने ।
तीनबुँदे सहमतिमा हस्ताक्षर
यसैबीच सरकार र पार्टीबीच तीनबुँदे सहमतिका हस्ताक्षर भएको छ । नेपाल सरकारको तर्फबाट गृहमन्त्री रामबहादुर थापा र नेपाल कम्युनिष्ट पार्टीको तर्फबाट प्रवक्ता खड्गबहादुर विश्वकर्मा ‘प्रकाण्ड’ले हस्ताक्षर गरेका छन् ।
सहमतिपत्रमा भनिएको छ, ‘दुवै पक्ष नेपाल सरकार तथा नेपाल कम्युनिस्ट पार्टी देशको राजनीतिक समस्याहरू वार्ता तथा संवादबाट समाधान गर्न सहमत भएका छौँ । आफ्ना सबै राजनीतिक क्रियाकलापहरू शान्तिपूर्ण रूपमा सञ्चालन गर्न सहमत भएको छ । नेपाल सरकार नेपाल कम्युनिस्ट पार्टीमाथि लगाइएको प्रतिबन्ध हटाउन, कारागारमा भएका नेता तथा कार्यकर्ताको रिहा गर्दै सम्पूर्ण मुद्दा खारेज गर्न सहमत भएको छ । ’
सहमतिमा देशको राजनीतिक समस्याहरु दुवै पक्षले वार्ता र संवादबाट समाधान गर्न सहमत भएको, नेपाल कम्युनिष्ट पार्टीले आफ्ना सबै राजनीतिक क्रियाकलाप शान्तिपूर्ण रुपमा सञ्चालन गर्न सहमत भएका छन् ।
यस्तै, नेपाल कम्युनिष्ट पार्टीमाथि लगाइएको प्रतिबन्ध हटाउन र कारागारमा रहेका नेता तथा कार्यकर्ताको रिहाइ गरी सम्पूर्ण मुद्दा खारेज गर्न तयार रहेका छन् ।
नेपाल शान्तिपूर्ण युगमा: प्रम
प्रधानमन्त्री एवं नेपाल कम्युनिष्ट पार्टी (नेकपा) का अध्यक्ष केपी शर्मा ओलीले नेपाल अब शान्तिपूर्ण युगमा प्रवेश गरेको जानकारी दिएका छन् ।
नेपाल र नेपाली जनताले शान्ति खोजेको चर्चा गर्दै प्रधानमन्त्री ओलीले राष्ट्रियता, राष्ट्रिय अखण्डता, सामाजिक न्याय र समानता, अधिकारसम्म पुग्ने अवसरको प्राप्ती, लोकतन्त्रको रक्षा र शान्ति चाहेको चर्चा गरे । यो सहमतिले नेपाललाई नयाँ युगमा प्रवेश गराएको ओलीको बुझाइ रहेको छ । यसअघि सिके राउतसँग पनि यसैगरी वार्ताबाट सहमति गरी शान्तिको मूलधारमा ल्याएको प्रधानमन्त्री ओलीले स्मरण गरे ।