धरानः नेपाल बसोबास बस्ती संरक्षण समाजले विभिन्न दाताहरुको सहयोगमा धरानका विभिन्न स्थानमा सुकुम्बासी तथा विपन्न परिवारलाई मङ्गलबार राहतस्वरुप खाद्यान्न सामग्री वितरण गरेको छ ।
समाजको पहलमा धरान–१७ स्थित साउने वस्तीका ४६ घर, १६ नम्बर वडा सूर्य टोलका १९ घर र १३ नम्बर वडा अमर वस्तीका १३ घर गरी जम्मा ७८ घर परिवारलाई समाजका केन्द्रीय अध्यक्ष कुमार कार्की, धरान नगर अध्यक्ष आइत लिम्बू, उपाध्यक्ष विनोद मगरलगायतले चामल, दाल, नुन, तेल वितरण गरे ।
लामो समयदेखिको लकडाउनका कारण काम बन्द भएर ‘माम’ बन्द भएका सुकुम्बासी तथा विपन्न परिवारलाई तत्काल राहतस्वरुप खाद्यान्न वितरण गरिएको समाजका केन्द्रीय अध्यक्ष कार्कीले बताए ।
कोभिड महामारीले समस्यामा परेका विपन्न परिवारलाई थोरै भए पनि राहत होस् भन्ने उद्देश्यले समाजको तर्फबाट विभिन्न ठाउँमा खाद्यान्न सामग्री वितरण गरिएको नगर अध्यक्ष लिम्बूले बताए ।
गाँस, बास, कपास, शिक्षा, स्वास्थ्य समाजले उठाएका मुद्दाहरुमध्ये महामारीको समयमा थोरै भए पनि खाद्यान्न वितरण गरिएको समाजका नगर सचिव सुसास राईले बताए ।
धरान–१७ स्थित साउने निवासी नैनबहादुर दर्जीले समाजको तर्फबाट राहतस्वरुप खाद्य सामग्री आउँदा खुशी ब्यक्त गरे । ‘हामी घरमा श्रीमान–श्रीमती मात्रै छौं, बुढाबुढी भइयो काम गर्न सकिँदैन यति भए पनि १०–१५ दिन खाइन्छ’, दर्जीले भने । साउने वस्तीकै अमृतमाया राईले लकडाउनमा काम बन्द भएका कारण दैनिक गुजारा गर्न समस्या भइरहेका बेलामा समाजले दिएको खाद्य सामग्रीले तत्कालका लागि गर्जो टरेको बताइन् । तस्वीरः तिर्थ कार्की