धरानः धरानः संसद विघटन गरिएको विरोधमा धरानमा राँके जुलुस निकालिएको छ ।
नेकपानिकट प्रचण्ड–माधव समूहको राष्ट्रिय युवा संघ नेपाल र जनता संघीय समाजवादी पार्टीका कार्यकर्ताले राँके जुलुस निकालेको हो ।
जनताको बलिदानीबाट स्थापना गरिएको गणतन्त्र, संघीयता, धर्म निरपेक्षता, समावेशिताजस्ता राजनैतिक उपलब्धीमाथि प्रहार गर्ने गरी प्रतिगामी कदम चालिएको भन्दै प्रचण्ड–माधव समूहका कार्यकर्ता र जनता समावादी पार्टीका कार्यकर्ताले शनिबार साँझ धरान बजारमा राँके जुलुस प्रदर्शन गरेको हो ।
प्रधानमन्त्री र राष्ट्रपतिविरुद्ध चर्का नाराबाजी गर्दै धरानस्थित छाताचोकबाट शुरु भएको राँके जुलुस भानुचोकमा पुगेर कोणसभामा परिणत भएको थियो ।
असंवैधानिक कदम फिर्ता गर्न, राष्ट्रपतिको गरीमा कायम गर्न, विधिको शासन लागू गर्न लगायतका नारा लगाउँदै कार्यकर्ताहरु सडकमा निस्किएका थिए ।
राष्ट्रिय युवा संघका केन्द्रीय सदस्य हरि लिम्बूले प्रतिगामी र गैर–संवैधानिक संसद विघटनले देशलाई प्रतिगमनतर्फ धकेल्ने प्रयास भएको दावी गरे । कार्यक्रममा समाजवादीका धरान उपमहानगर समिति अध्यक्ष ताजुप लिम्बूले बोलेका थिए । प्रधानमन्त्री ओलीले संसारकै उत्कृष्ट संविधान भन्ने गरेको तर उनलै असंवैधानिक कदम चालेको उनले आरोप लगाए ।
खुलेनन् कार्यकर्ता
संघमा राजनीतिक वृत्तमा आएको हलचलले स्थानीयस्तरका नेता कता लाग्ने, कुन कित्ता समात्ने भन्ने अन्यौलता अझै कायमै छ । कतिपय कार्यकर्ताले फेसबुकमा पोष्ट्याउँदै चित्त बुझाइरहेका छन् भने कतिपयले फेसबुकै सिधैं लेखेका पनि छन्–यता जाउँ भने अर्कोले सिध्याउने, उता जाउँ भने अर्कोले सिध्याउने, गाह्रो छ हौं हामीलाई आदि इत्यादि ।
धरानमा भएको विरोध कार्यक्रममा पनि माधवपक्षका कार्यकर्ता खुलेर सडक आन्दोलनमा आउन सकेका छैनन् । शुक्रबार भएको विरोध कार्यक्रममा पनि माधवपक्षका नेता, कार्यकर्ताको उपस्थिति न्यून रह्यो । त्यहाँ अधिकांश प्रचण्ड पक्षका कार्यकर्ता उपस्थित थिए । प्रचण्ड पक्षधर कार्यकर्ताले नै सडक संघर्ष गरिरहेका छन् । धरानमा प्रम ओली पक्षका भन्दा नेपाल पक्षका कार्यकर्ता बढी छन् । तर पनि भनेजस्तो कार्यकर्ता खुल्न नसकेको एक नेताले बताए । ‘अलि कम्तीरुपमा उपस्थिति जनाएकोचाहिँ पक्कै हो’, उनले भने, ‘हिजो त्यस्तो भएपनि आज भने अलि बढी कार्यकर्ता खुलेर आएका छन् ।
कार्यक्रममा कतिपय प्रधानमन्त्री केपी शर्मा ओली पक्षका कार्यकर्ता भने भानुचोक घण्टाघर छेऊ र लोकतान्त्रिक चौतारी छेऊ बसेर रमिता पनि हेरिरहेका थिए । ‘पहिला सँगै थियौं, अहिलेको गतिविधि नियाल्न मन लाग्यो’, घण्टाघर अगाडि भेटिएका एक कार्यकर्ताले भने । तस्वीरहरुः लक्ष्मण थापा