धरानः काठमाडौं उपत्यकामा सवारी साधानमा लगाइएको जोरविजोर प्रणाली हटेको छ ।
आज बसेको उपत्यकाका तीन जिल्लाका प्रमुख जिल्ला अधिकारीको बैठकले निजी तथा सार्वजनिक सवारी साधनमा लगाइएको जोरविजोर प्रणाली हटाउने निर्णय गरेको काठमाडौंका प्रमुख जिल्ला अधिकारी कालिप्रसाद पराजुलीले बताए ।
काठमाडौं उपत्यका बाहिरबाट आउने सवारी साधनले प्रवेशका लागि पास लिनुपर्नेछ । त्यसैगरी यसअघि २५ सिट भन्दा माथिका सवारी साधन मात्रै चल्न दिने भएकोमा अब सबै सवारी साधन सञ्चालन गर्न दिने भएको छ ।
सार्वजनिक यातायातमा कुल सिट क्षमता भन्दा बढी यात्रु राख्न नपाउने भएका छन् । मास्क नलगाउने यात्रुलाई सवारी साधनमा प्रवेश गर्न नदिने आदेशमा उल्लेख गरेको छ ।
सफा टेम्बो तथा निलो माइक्रोले ९ जना यात्रु भन्दा बढी चढाउन नपाउने भएका छन् । सार्वजनिक तथा निजी निर्माण कार्यको लागि निर्माण ढुवानी बेलुका ९ बजेदेखि विहान ५ बजेसम्म सञ्चालन गर्ने पाइने भएको छ ।
जोर विजोर प्रणाली हटेको र अब सबै सवारी साधन स्वास्थ्य सुरक्षा मापदण्ड पालना गरेर सञ्चालन गर्न सकिने उनले जानकारी दिए ।
असार ३१ गतेसम्म निषेधाज्ञा जारी रहेको प्रमुख जिल्ला अधिकारीहरूले बताएका छन् ।