बिर्तामोडः नेकपा एमालेका अध्यक्ष केपी शर्मा ओलीले माधव नेपालले पार्टी विभाजन गरेर पतनको बाटो रोजेको आरोप लगाएका छन् ।
एमाले झापा जिल्ला कमिटीले बिर्तामोडमा आयोजना गरेको अगुवा कार्यकर्ता भेलालाई सम्बोधन गर्दै उनले सो कुरा बताएका हुन् । उनले माधव नेपालले नै एमाले सरकार हटाएको दावी गरे । ‘एमाले सरकार हटाउने मुख्य व्यक्ति माधव नेपाल नै हुन् ।’ उनले कार्यक्रममा भने ।
नेपालप्रति कटाक्ष गर्दै ओले भने, ‘माधव नेपालले वडा सदस्यको चुनाव पनि जित्दैनन् ।’ उनले माधव नेपालले नयाँ पार्टी बनाएको नभई तमासा देखाउने काम गरेको बताए । ओलीले सम्बोधनको अधिकांश समय नेपालप्रति कटाक्ष गरेका थिए ।
पार्टी फुटाउनु पर्ने कुनै आवश्यकता नभएको ओलीको भनाइ थियो । माधव नेपालले पार्टीलाई जसरी पनि फुटाउने कोसिस गरेको ओलीले बताए । उनले भने, ‘पार्टी फुटाउने कोशिस गरेका थिए आफैं चोइटिएर गए ।’
नेकपा माओवादी केन्द्रका अध्यक्ष पुष्पकमल दाहालप्रति कटाक्ष गर्दै ओलीले धोकेबाज नेता भएको बताए । उनले भने, ‘माओवादी केन्द्रमा अहिले पनि रहिरहेका नेता तथा कार्यकर्ता हामीसँग आउनुहोस् । उहाँसँग अल्मलिएर नबस्नुहोस् ।’ पद पाइएन भने पार्टी नै छाडेर जान्छु भन्ने असली कम्युनिष्ट नभएको ओलीको भनाइ थियो ।
सभामुखले गैरसांसदलाई संसदमा राखेकै कारणले संसद अवरोध गरिएको उनले बताए । उनले भने,‘पार्टी फुटाउन भूमिका खेले। पार्टीको कार्यकर्ताको भूमिका खेले। गैरसांसद् राखेर संसद चलाउन खोजेका छन् । हामीले जायज काम गरेका छौँ। त्यो विरोध कायमै रहन्छ ।’