धरानः खोटाङमा शुक्रबार राति भएको ट्याक्टर दुर्घटनामा परेर सहचालकको मृत्यु भएको छ ।
ट्याक्टरका सहचालक दिक्तेल–रुपाकोट–मझुवागढी–४ का १८ वर्षीय पिलक्स राईको मृत्यु भएको प्रहरीले जनाएको छ ।
मध्यपहाडी लोकमार्गअन्तर्गत दिक्तेल–रुपाकोट–मझुवागढी नगरपालिका–१३ मा स१त ७०७१ नम्बरको ट्याक्टर दुर्घटनामा परेको प्रहरीले जनाएको छ । रबुवाबाट दिक्तेलतर्फ जाँदै गरेको ट्याक्टर राति १०ः३० बजेतिर अनियन्त्रित भएर सडकमै पल्टिएर दुर्घटना भएको थियो ।
सहचालक राईलाई ट्याक्टरले च्याप्दा घटनास्थलमै मृत्यु भएको प्रहरीले जनाएको छ । हलेसी तिवाचुङ–३ बस्ने वर्ष २४ को महेन्द्र राई प्रहरी चौकी नुनथलाको नियन्त्रणमा रहेको प्रहरीले जनाएको छ । तीब्र गतिका कारण दुर्घटना भएको प्रहरीले जनाएको छ ।
यता इटहरी–२० तरहरास्थित पानीपियानजिक जङ्गलमा मोटरसाइकल दुर्घटना हुँदा दुईजना प्रहरी गम्भीर घाइते भएका छन् ।
धरानबाट इटहरीतर्फ जाँदै गरेको को३८प ४११९ नम्बरको मोटरसाइकल आफै अनियन्त्रित भई दुर्घटना हुँदा १ नं प्रदेश प्रहरी तालिम केन्द्र रानी विराटनगरमा कार्यरत प्रहरी जवान अन्दाजी वर्ष २९ को तेजकुमार राई र पछाडि सवार प्रहरी जवान इन्द्र चौहान गम्भीर घाइते भएको १ नं. प्रदेश ट्राफिक प्रहरी कार्यालयका डिएसपी सुमनकुमार तिम्सिनाले जानकारी दिए ।
दुवैजनाको धरानस्थित बीपी कोइराला स्वास्थ्य विज्ञान प्रतिष्ठान धरानमा उपचार भइरहेको छ । मोटरसाइकल प्रहरी चौकी तरहराको नियन्त्रणमा रहेको प्रहरीले जनाएको छ । तीब्र गतिका कारण दुर्घटना भएको प्रहरीले जनाएको छ ।
यस्तै, सुनसरीको रामधुनी नपा–३ मा टिपरले स्कुटीलाई ठक्कर दिँदा चालक गम्भीर घाइते भएका छन् । बिजुली अफिसअगाडि पूर्व–पश्चिम राजमार्गमा पूर्वबाट पश्चिमतर्फ जाँदै गरेको प्रदेश नं १–००६ ख २७६० नं टिपरले विपरीत दिशाबाट आइरहेको प्रदेश नं १ –०२–०४१ प ७२३५ नं स्कुटरलाई ठक्कर दिँदा स्कुटर चालक अशोक चौधरी घाइते भएका हुन् । उनको विराटनगरमा उपचार भइरहेको छ । टिपर चालक वर्ष ४६ को चत्तुरलाल चौधरी प्रहरीले नियन्त्रणमा रहेका छन् ।