धरानः धरानमा ‘धरान’ लेखिएको विशाल बोर्ड राखिने भएको छ ।
धरानको चिनारी तथा पर्यटन प्रवद्र्धन गर्ने उद्देश्यसहित धरान–२० स्थित देउराली डाँडामा विशाल धरान अक्षर बोर्ड निर्माण गरिने भएको हो । धरान समाज युकेको लगानीमा निर्माण हुन लागेको सो बोर्ड धरान उपमहानगरपालिकाका कार्यवाहक नगर प्रमुख अइन्द्रविक्रम बेघाले जानकारी दिए ।
सो बोर्ड कोशी प्रदेशकै ठूलो अक्षर बोर्डका रूपमा स्थापित हुने अपेक्षा गरिएको छ । सो बोर्ड धरानको तीनकुनेलगायत शहरका विभिन्न स्थानबाट स्पष्ट देखिने गरी निर्माण गरिने जनाइएको छ । यस परियोजनाले सिङ्गो धरानलाई पर्यटनको नयाँ आकर्षक गन्तव्यका रूपमा थप परिचित गराउने विश्वास लिइएको छ ।
उनका अनुसार परियोजनाका लागि आवश्यक जग्गा सार्वजनिक क्षेत्रभित्र नै पर्याप्त मात्रामा उपलब्ध रहेको छ । स्थलगत अध्ययनका क्रममा प्राविधिक टोलीले देउराली डाँडाको भू–भाग उपयुक्त रहेको निष्कर्ष निकालेको र हालको अवस्था अनुसार यो भन्दा उपयुक्त वैकल्पिक स्थान नरहेको समेत जानकारी दिएका छन् ।
अक्षर बोर्ड निर्माणका लागि आवश्यक लागत भने प्राविधिक इस्टिमेट तयार भएपछि मात्रै यकिन हुने बताइएको छ । परियोजनामा आर्थिक लगानी धरान समाज युकेले गर्नेछ भने जग्गा व्यवस्थापन, प्राविधिक अध्ययन, डिजाइन तथा आवश्यक समन्वयको जिम्मेवारी धरान उपमहानगरपालिकाले लिने जनाइएको छ ।
धरान–२० को प्राकृतिक सौन्दर्य, हरियाली तथा उच्च भू–भागलाई पर्यटनसँग जोड्दै धरानको पहिचानलाई राष्ट्रिय तथा अन्तर्राष्ट्रिय स्तरमा प्रवद्र्धन गर्ने लक्ष्यसहित यो योजना अघि बढाइएको कार्यवाहक मेयर बेघाले बताए । तस्वीरः सुजन तामाङ